Numeri 17 - Bhaibhiri Idzva rechiShona rine Dhuterokanonika

Tsvimbo yaAroni

¹ Tenzi akataurira Mosesi achiti,

² “Taurira vaIsiraeri vakupe tsvimbo imwe neimwe ichimirira dzimba dzamadzitateguru avo dzichibva kuvatungamiriri vavo vose nedzimba dzamadzitateguru avo dziri tsvimbo gumi nembiri. Nyora zita romutungamiriri patsvimbo yake.

³ Asi patsvimbo yedzinza rokwaRevhi nyora zita raAroni nokuti mutungamiriri wedzinza roga roga ngaave netsvimbo yake.

⁴ Tora tsvimbo dzacho udziise mutendhe rokusanganira pamberi pebhokisi rouchapupu paya pandinosangana nemi.

⁵ Tsvimbo yemunhu wandichasarudza ichabukira. Ndipo pandichapedza kunyunyuta kwaunoitirwa navaIsiraeri.”

⁶ Mosesi akataurira vaIsiraeri mumwe nomumwe wavatungamiriri vemadzinza akaunza tsvimbo zvichitevedza dzamadzitateguru avo. Dzaiva gumi nembiri, tsvimbo yaAroni yakaiswa pamwechete nadzo.

⁷ Mosesi akatora tsvimbo dzacho akandodziisa mutendhe rouchapupu pana Tenzi.

⁸ Mangwana acho Mosesi akapinda mutendhe rouchapupu wanei tsvimbo yaAroni wedzinza raRevhi yabukira yava nematungirwa yava nemaruva namaarimondi akaibva.

⁹ Mosesi akatora tsvimbo dziya dzose dzaiva pana Tenzi, pamberi pebhokisi rechitenderano, ndokudziunza kuzoratidza vaIsiraeri vose. Vakadzitarisa. Varume vaya vose vakatora tsvimbo dzavo.

¹⁰ Tenzi ndokutaurira Mosesi achiti, “Dzorera tsvimbo yaAroni pamberi pebhokisi rouchapupu, ichengeterwe kuyambira vapanduki kuti upedze kunyunyuta kwavo varege kufa.”

¹¹ Mosesi akaita zvaakarayirwa naTenzi.

¹² VaIsiraeri vakataurira Mosesi vachiti, “Onaika, tava kufa, taparara, chokwadi ndiko kupera kwedu tose uku!

¹³ Munhu wose anoswedera kutendhe raTenzi ari kufa zvino topera kufa here?”