Genesi 10 - Bhaibhiri Idzva rechiShona rine Dhuterokanonika

Zvizvarwa zvavana vatatu vaNowa

¹ Izvi ndizvo zvizvarwa zvavana vaNowa vanoti Shemu naHamu naJafeti zvaakabereka shure kwamafashamo emvura.

Zvizvarwa zvokwaJafeti

² Jafeti akabereka vanakomana vake vanoti: Gomeri naMagogu naMadhai naJavhani naTubhari naMesheki naTirasi.

³ Gomeri akabereka vanakomana vake vanoti: Ashikenazi naRifati naTogarima.

⁴ Javhani akabereka vanakomana vake vanoti: Erisha naTarishishi naKitimu naDhodhanimu.

⁵ Izvozvi ndizvo zvizvarwa zvokwaJafeti, makabva madzinza akasiyana-siyana, akazogara akatevedza mahombekombe egungwa. Vagere munyika iyi vari mudzimhuri dzavo, mumarudzi akasiyana-siyana maererano nemitauro yavo.

Zvizvarwa zvokwaHamu

⁶ Hamu akabereka vanakomana vake vanoti: Kushi naIjipiti naPuti naKanani.

⁷ Kushi akabereka vanakomana vake vanoti: Sebha naHavhira naSabhuta naRaama naSabhuteka. Raama akabereka vanakomana vake vanoti: Shebha naDhedhani.

⁸ Kushi akaberekawo mwana wake mukomana anonzi Nimurodhi. Nimurodhi ndiye akazova mambo wokutanga pasi pano.

⁹ Nenyasha dzaTenzi, Nimurodhi aiva hombarume chaiyo ndosaka vanhu vakazoita tsumo inoti, “Nenyasha dzaTenzi, ihombarume chaiyo saNimurodhi.”

¹⁰ Akatanga kutonga Bhabheri neEreki neAkadhi munyika yeShinari.

¹¹ Akabva kunyika iyoyo akaenda kunyika yeAsiria, ndokuvaka guta reNinevhe neRehobhoti neKara

¹² neReseni, guta guru riri pakati peNinevhe neKara.

¹³ Ijipiti akabereka Rudhimu naAnamimu naRehabhimu, kwouya Nafutuhimu

¹⁴ naPatirusimu naKasiruhimu tateguru kwakabva vaFirisitia, naKafutorimu.

¹⁵ Kanani akabereka Sidhoni dangwe rake, naHeti

¹⁶ ndiye tateguru wamarudzi aya anoti, vaJebhusi nevaAmori nevaGirigashi,

¹⁷ kwoti vaHivhi nevaAriki nevaSinai

¹⁸ kwozoti vaArivhadhi nevaZemari nevaHamati. Gare gare madzinza evaKanani akazopararira.

¹⁹ Nyika yavaKanani yaivambira kuSidhoni zvichienda kuGerari, kundosvika kuGaza, zvoenda nokuSodhomu neGomora neAdhima neZebhoimu kundogumira kuRasha.

²⁰ Ndizvozvi zvizvarwa zvokwaHamu, namadzinza avo nemitauro yavo nenyika dzavo nendudzi dzavo.

Zvizvarwa zvokwaShemu

²¹ Shemu mukoma waJafeti akaberekawo vana. Ndiye tateguru wemhuri yevaEbheru.

²² Shemu akabereka vanakomana vake vanoti: Eramu naAshuri naAripakishadhi naRudhi naAramu.

²³ Aramu akabereka vanakomana vake vanoti: Uzi naHuru naGeteri naMashi.

²⁴ Aripakishadhi akabereka Shera, aShera akabereka Ebheru.

²⁵ Ebheru akabereka vanakomana vake vaviri, mumwe ndiPeregi nokuti panguva yake nyika yakanga yakakamuraniswa. Munun'una wake ainzi Jokitani.

²⁶ Jokitani akabereka Arimodhadhi naSherefu naHazarimavheti naJera,

²⁷ kwozouya Hadhoramu naUzari naDhikira

²⁸ naObhari naAbhimaeri naShebha

²⁹ kwozouya Ofiri naHavhira naJobhabhu, vose ivava ndivo vanakomana vaJokitani.

³⁰ Nyika yavakanga vagere yaibvira kuMesha ichinanga nokuSefari kugomo rokumabvazuva.

³¹ Ndizvozvi zvizvarwa zvokwaShemu namadzinza avo nemitauro yavo nenyika dzavo nendudzi dzavo.

³² Iwaya ndiwo madzinza emhuri dzavanakomana vaNowa, nezvizukuru zvavo uye nendudzi dzavo, vakazotekeshera panyika mushure mamafashamo emvura.