Zefania 1 - Bhaibhiri Idzva rechiShona rine Dhuterokanonika

Mashoko okusuma

¹ Shoko rakauya kuna Zefaniya mwanakomana waKushi, mwana waGadharia mwanakomana waAmariya, mwanakomana waHezekiya, mumazuva aJosiya mwanakomana waAmoni mambo wokwaJudha.

ZUVA ROKUTONGA KWATENZI Kurangwa kuchaitwa pasi pose

² “Ndichanyatsotsvaira kutopedza zvose zviri pamusoro payo nyika. Ndizvo zviri kutaura Tenzi.

³ Ndichatsvaira vanhu nemhuka uye ndichatsvaira shiri dzedenga nehove dzegungwa uye zvimhingamupini, vanhu vakaipa, ndichatsakatisa vanhu pamusoro payo nyika. Ndizvo zviri kutaura Tenzi.

Kurangwa kuchaitwa vanonamata vamwari vasirivo

⁴ “Ndichasumudzira vokwaJudha shamhu yoruoko rwangu uye vagari veJerusaremu vose zvavo. Ndichatsakatisawo munzvimbo ino vokwaBhaari vakasara uye nezita revapristi vanonamata zvifananidzo.

⁵ Ivo vanopfugama kunamata pamusoro pedzimba gurusvusvu rezvinhu zvomumatenga, vanopfugama pasi vachipika nezita raTenzi ivo vachipika zvavo nezita raMirikomu,

⁶ navakafuratira Tenzi vasisatsvaki Tenzi kana kunzwa kuti anotii.”

⁷ Chitotii zvenyu mwi-i pamberi paTenzi Mwari nokuti zuva raTenzi rosvika Tenzi akagadzirira chibayiro akazvitsaurira vaenzi vake.

Kurangwa kuchaitwa makurukota

⁸ “Pazuva raTenzi rechibayiro ndicharanga vakuru vakuru navanakomana vamambo nevose zvavo vanopfeka hanzu dzechirudzi.

⁹ Nezuva iroro ndicharanga munhu wose anodarika chikumbaridzo napamusuo navanozadza dzimba dzatenzi wavo noutsinye nounyengedzi.

Kurangwa kuchaitwa vemhindu dzokutengeserana

¹⁰ “Pazuva iroro ndizvo zviri kutaura Tenzi kucharira mhere kuSuo Guru reHove kuungudza kuchibva kumana rechipiri, kungondomoka kukuru kuzvikomo.

¹¹ Chemai imi vagari vokuMakiteshi nokuti vemhindu dzokutengeserana vose hapasisina ivo vokupima sirivha vose vakatsakatika.

Kurangwa kuchaitwa vanhu vasina hanya naMwari

¹² “Panguva iyoyo ndichatsvaka nerambi muJerusaremu ndichiranga vanhu ivavo vane manzvengeredzero avo vanozviti nechomumwoyo, ‘Tenzi hapana zvaanomboita, zvakanaka kana zvakaipa.’

¹³ Zvinhu zvavo zvichapambwa dzimba dzavo dzichaparadzwa kunyange zvavo vakavaka dzimba havazombodzigari. Kunyange zvavo vakasima minda yemagirepisi, waini yacho havainwi.”

ZUVA GURU RATENZI

¹⁴ Zuva guru raTenzi rosvika, rokasika chaizvo kusvika, bongozozo rezuva raTenzi rinorwadza, gamba chairo richatobongomora kuiridza mhere ipapo.

¹⁵ Zuva iroro izuva rehasha musi wokutambura nokurwadzwa zuva repfumvu nokuparara musi werima nezarima zuva ramakore akati kwirindindi

¹⁶ zuva rokurira kwehwamanda nokurira kwemhere yehondo yokurwisa maguta etsvingo nezvokuzvidzivirira nazvo zvakati dzu-u kureba.

¹⁷ “Ndichaonesa vanhu nhamo zvokutofamba samapofu zvawo nokuti vakatadzira Tenzi. Ropa ravo richanyatsowodzvorwa seguruva uye nyama yavo sendove.”

¹⁸ Kunyange sirivha yavo kana ndarama yavo haigoni kuvanunura, pamusi wehasha dzaTenzi. Nyika yose zvayo icharoromeswa mumoto wehasha dzake dzeshanje; achanyatsoyerekana avaparadza; ndozvaachaita kuvagari vapasi pano vose zvavo.