Numeri 21 - Bhaibhiri Idzva rechiShona rine Dhuterokanonika

VaIsiraeri vanokunda vaKanani

¹ Mambo weAradhi muKanani akanga agere kuNegevhu, kumaodzanyemba kweKanani akanzwa kuti vaIsiraeri vari kuuya nenzira yokuAtarimu. Akandorwisa vaIsiraeri akatapa vamwe vavo.

² Ipapo vaIsiraeri vakapika mhiko kuna Tenzi vachiti, “Kana mukatiita kuti tikunde vanhu ava, maguta avo tinoaita chibayiro, tichiaparadza zvachose.”

³ Tenzi akanzwa zvakataurwa neIsiraeri akavabatsira kukunda vaKanani. VaIsiraeri vakavaparadza zvachose pamwechete namaguta avo. Ipapo pakazotumidzwa zita rokuti Horima.

Nyoka yendarira

⁴ VaIsiraeri vakabva pagomo reHoru vakafamba nenzira inoenda kuGungwa Dzvuku kuti vanyenyeredze nyika yaEdhomu. Asi vari munzira kudaro vanhu vakaora mwoyo,

⁵ vakanyunyutira Mwari naMosesi vachiti, “Ko makatiburitsireiko kuIjipiti? Heya maida kuti tifire mugwenga muno! Hamuna chokudya kana mvura. Tafinhwa notuchingwa utwu tusina maturo!”

⁶ Tenzi akatumira vaIsiraeri nyoka dzinouturu hunopisa somoto, dzikavaruma, vanhu vazhinji veIsiraeri vakafa.

⁷ Vanhu vakauya kuna Mosesi vakati, “Takatadza nokuti takanyunyutira Tenzi nemi. Tinamatireiwo kuna Tenzi kuti atibvisire nyoka idzi.” Naizvozvo Mosesi ndokuvakumbirira.

⁸ Tenzi ndokutaurira Mosesi achiti, “Pfura nyoka inouturu hunopisa somoto, uiturike pabango, saka ani naani anenge arumwa, kana akatarisa nyoka yaunopfura, achararama.”

⁹ Mosesi akapfura nyoka yendarira akaiturika pabango. Naizvozvo ani naani ainge arumwa, aiti akangotarisa nyoka yendarira obva ararama.

Vakabva pagomo reHoru vakasvika pabani reMoabhu

¹⁰ VaIsiraeri vakafamba vakandodzika matendhe avo kuObhoti.

¹¹ Vakazobva kuObhoti vakandodzika matendhe avo paIyeabharimu, murenje rakatarisana nenyika yaMoabhu nechokumabvazuva.

¹² Vakazobvapo vakandodzika matendhe avo kubani reZeredhi.

¹³ Vakazobvapo vakandodzika matendhe avo mhiri kwerwizi Arinoni ruri murenje rinosvika kunyika yavaAmori. Arinoni ndirwo runoganhura nyika yavaMoabhu navaAmori.

¹⁴ Ndokusaka zvakanyorwa mubhuku rinonzi Bhuku reHondo dzaTenzi zvinonzi; Guta reWahebhu riri muSufa namapani aArinoni

¹⁵ namawere amapani anosvika kuAru akatsamirana nemiganhu yeMoabhu.

¹⁶ Vakasimudzira rwendo rwavo vakasvika patsime reBheeri ndipo patsime paya pakaudzwa Mosesi naTenzi kuti, “Unganidza vanhu ndivape mvura.”

¹⁷ VaIsiraeri vakaimba rwiyo urwu runoti; Iwe tsime, buritsa mvura. Riimbirei rumbo.

¹⁸ Tsime rakacherwa namachinda rafukunurwa navatungamiriri vavanhu. Rakacherwa netsvimbo youshe rakacherwawo nemidonzvo yavo. Vakabva murenje vakaenda kuMatana.

¹⁹ Vakabva paMatana vakaenda kuNaharieri. Vakabva Naharieri vakaenda kuBhamoti.

²⁰ Vakazobva kuBhamoti vakaenda kumupata uri kubani reMoabhu pamusoro pegomo rePisiga pakatarisana nerenje.

VaIsiraeri vanokunda mambo Sihoni namambo Ogu

²¹ VaIsiraeri vakatuma nhume kuna Sihoni, mambo wavaAmori, vachiti,

²² “Dotibvumiraiwo kuti tipfuure nomunyika yenyu. Hatizobudi munzira tichipinda muminda yenyu yembesa kana yemivhaini, kana kunwa mvura yetsime renyu zvaro. Ticharamba tiri muMugwagwa Mukuru Wamambo kudzamara tabuda munyika yenyu.”

²³ Asi Sihoni haana kubvumira vaIsiraeri kuti vapfuure nomunyika yake. Akatounganidza hondo yake yose, akandorwisa vaIsiraeri kurenje,

²⁴ vaIsiraeri vakavarakasha namapakatwa, vakavatorera nyika yavo kubvira muna Arinoni kundosvika muna Jabhoko, vachindogumira kunyika yavaAmoni nokuti muganho wavaAmoni wakanga wakanyatsodzivirirwa.

²⁵ Saka vaIsiraeri vakatorera vaAmori maguta avo ose, vakagaramo vakatora kunyange Heshibhoni nemisha yakanga yakaripoteredza.

²⁶ MuHeshibhoni ndimo maiva mumuzinda waSihoni mambo wavaAmori, akarwa naakanga ari mambo wavaMoabhu akamubvutira nyika yake yose kundosvika muna Arinoni.

²⁷ Ndokusaka vadetembi venziyo dzengondo vachiti “Uyai kuHeshibhoni, rivakwe patsva, guta raSihoni rinyatsoti dzuu kumira.

²⁸ Moto wakatombobudawo muHeshibhoni, uchibva muguta raiye mambo Sihoni. Wakaroromesa Aru guta ravaMoabhu, ukaparadza machinda okuArinoni.

²⁹ Zvakuwana nhasi Moabhu, maororwa imi vanamati vaKemoshi. Kemoshi akarega vanakomana vachiva vapoteri, vanasikana vake vachiva nhapwa. Vakava nhapwa dzaSihoni mambo wavaAmori.

³⁰ Vana vavo vose vakaparadzwa Vakaparadzwa kubvira kuHeshibhoni kusvikira Dhibhoni, kubvira kuNashimu kusvikira kuNofa, pedyo neMadhebha.”

³¹ Naizvozvo vaIsiraeri vakabva vagara munyika yavaAmori,

³² Mosesi ndokutuma vanhu kundosora guta reJazeri. VaIsiraeri vatora misha yakanga yakaripoteredza, vakadzingawo vaAmori vaigaramo.

³³ Vakazotsauka vakaenda nokuBhashani. Ogi mambo weBhashani akavavinga nehondo yake akavarwisa kuEdhirei.

³⁴ Asi Tenzi akataurira Mosesi kuti, “Usambomutya zvako. Ndamuisa mumaoko ako navanhu vake vose nenyika yake. Zviya zvawakaita kuna Sihoni mambo wavaAmori aigara kuHeshibhoni ndizvo zvaunofanira kuita kwaari.”

³⁵ Naizvozvo vaIsiraeri vakazomuuraya pamwechete navanakomana vake navanhu vake vose. Kusvikira pasisina nomumwe wavo akapunyuka. Nyika yake yakabva yava yavo.