Mapisarema 20 - Bhaibhiri Idzva rechiShona rine Dhuterokanonika

Muimbisi, urwu Rwiyo rwaDhavhidhi.

Kunamatira mambo

¹ Dai TENZI akangokupindurai pazuva renhamo! Dai zita raMwari waJakobho angokudzivirirai.

² Ngaakutumirei rubatsiro runobva kunzvimbo inoera norutsigiro rwake runobva kuZioni.

³ Dai angoyeuka mipiro yenyu yose uye afadzwe nezvibayiro zvenyu zvose. Dzepfunde.

⁴ Dai angokupai zvinoda mwoyo wenyu aite kuti zvirongwa zvenyu zvibudirire.

⁵ Ipapo tichapururudzira kukunda kwenyu norufaro. Tigosimudza mureza wedu muzita raMwari wedu TENZI akuitirei zvose zvamunokumbira.

⁶ Zvino ndavakuziva kuti TENZI achabatsira muzodzwa wake, achamupindura ari kudenga rake rinoera nesimba roruoko rwake rworudyi.

⁷ Vamwe vanovimba nengoro dzehondo; vamwe vanovimba namabhiza asi isu tinovimba nezita raTENZI Mwari wedu.

⁸ Ivo vachaputsikira pasi vagowa asi isu tichamuka tigomira takati twi.

⁹ TENZI, Itai kuti mambo akunde, tipindureiwo pazuva ratinodaidzira.