Mapisarema 16 - Bhaibhiri Idzva rechiShona rine Dhuterokanonika

Nhetembo yaDhavhidhi.

Munamato wokuvimba naMwari

¹ Ndichengetei Mwari nokuti ndinopotera mamuri.

² Ndinoti kuna TENZI, “Imi ndimi TENZI wangu. Kunze kwenyu imi handina chimwe chakanaka.”

³ Varurami vari munyika ndivo vokumbahuru. Ndinofadzwa kwazvo navo.

⁴ Vanozvisarudzira mumwe mwari, vanozviwanzira nhamo. Handisi kuzopira kwavari miteuro yeropa. Handifi ndadaidza mazita avo nomuromo wangu.

⁵ TENZI ndiye mugove wangu nenhaka yangu. Nhaka yangu iri mumaoko ake.

⁶ Muganhu wangu waenda napakanaka. Hakusi kunaka ikoko kwakaita nhaka yangu.

⁷ Ndinorumbidza TENZI anondipa mazano kunyange usiku, mwoyo wangu unondinyevera.

⁸ Ndinoisa TENZI mberi kwangu nguva dzose; nokuti ari kurudyi rwangu, handitsuduguki.

⁹ Naizvozvo mwoyo wangu unofara, mweya wangu unopembera; kana muviri wangu uchava norugare.

¹⁰ Hamungandiregi ndichienda kunzvimbo yavakafa; kana kurega mururami wenyu achipinda muguva.

¹¹ Munondiratidza nzira youpenyu; pamuri ndipo pane rufaro ruzere kurudyi kwenyu kune rufaro nokusingaperi.