Mapisarema 12 - Bhaibhiri Idzva rechiShona rine Dhuterokanonika

Muimbisi, rumbo urwu runoimbwa navanezvokuimbisa zvine tambo dzewaya, zvetambo yechisere yamahon'era.

Kukumbira Mwari rubatsiro panhamo dzapanyika

¹ Tinunureiwo TENZI nokuti hapachisina mutsvene nokuti vakatendeseka vapera pakati pavanhu.

² Munhu wose ava kungotaurira nhema kune mumwe wake; vanhu vava kutaurirana zvisinganyatsonzwisisika; vanonakisa mukanwa zvenhando vachishandisa mazwi anoreva zvinhu zvakasiana.

³ Dai TENZI angocheka miromo yavanonakisa mukanwa zvenhando, vanoti,

⁴ “Nezvinobva pamuromo apa, tinokunda; miromo yedu tinayo; ndiani anotitonga.”

⁵ TENZI anoti, “Zvino ndichasimuka pamusana pavarombo varikupambwa nokugomera kwavatamburi, ndichavapa zvavanosuwira, zvokugara pasina chinovatambudza.”

⁶ Mazwi aTENZI, mazwi matsvene, akaita sesirivha yakacheneswa muvirira romoto ikagocheneswa kakapetwa kanomwe.

⁷ Imi TENZI tichengetedzeiwo, tidzivirireiwo nokusingaperi kuchizvarwa ichi.

⁸ Vakaipa vari kufamba kose kose uipi zvauri kurumbidzwa kudai pakati pavanhu.