Mapisarema 1 - Bhaibhiri Idzva rechiShona rine Dhuterokanonika

Zvavo vakarurama, vakaipa hameno zvavo

¹ Akakomborerwa munhu asingafambi panorangana vakaipa. Kana kuva munzira yavatadzi, kana kugara panogara vanonyomba,

² asi kuti anotofarira mutemo waTENZI uye anorangaririra mutemo waTENZI siku nesikati.

³ Akaita somuti wakasimwa pamahombekombe erwizi unobereka muchero wawo panguva yawo uri muti usingauni mashizha. Zvose zvaanoita zvinobudirira.

⁴ Asi hazvisirizvo zvakaita vakaipa, vakaita sehundi inopeperetswa nemhepo.

⁵ Naizvozvo padare rokutongwa, vakaipa havapamiri uye vatadzi mugungano ravakarurama havamumiri.

⁶ Nokuti TENZI ane hanya nenzira yavakarurama asi nzira yavakaipa ichaparara.