Numeri 8 - Bhaibhiri Idzva rechiShona

Kugadzika nokutungidza mwenje

¹ Tenzi akataurira Mosesi achiti,

² “Udza Aroni kuti paanondogadzika marambi, marambi manomwe anofanira kuvheneka akatarisa mberi kwechigadzikiro chomwenje.”

³ Aroni akaita saizvozvo akagadzika marambi akatarisa mberi kwechigadzikiro chomwenje sokuudzwa kwakaitwa Mosesi naTenzi.

⁴ Chigadzikiro chomwenje ichocho chakanga chakagadzirwa sezvizvi chakanga chakagadzirwa nendarama yakapfurwa kubvira pagaro racho kusvikira kumapazi acho ose. Mosesi akaita chigadziko chomwenje ichocho achitevedzera mufananidzo waakanga aratidzwa naTenzi.

Kuchenurwa nokukumikidzwa kwavaRevhi

⁵ Tenzi akataurira Mosesi achiti,

⁶ “Tsaura vaRevhi mukati muvaIsiraeri uvachenure.

⁷ Zvauchaita kwavari kuti uvachenure ndezvizvi vasase mvura yokuchenura munhu. Uvati vaveure vhudzi remiviri yavo rose nokusuka hanzu dzavo vazvishambidze ivo pachavo. Naizvozvo vanobva vava vanhu vachenurwa.

⁸ Ipapo ngavatore handira ichiri duku neupfu hwekoroni hwomupiro wembesanwa hwakakanyiwa namafuta eorivhi. Iwe unozotora imwe handira ichiri duku yomupiro wokupfupira zvitadzo.

⁹ Ukokorodze vaIsiraeri vose umise vaRevhi mberi kwetendhe rinoera.

¹⁰ Paunoturira vaRevhi kwandiri Tenzi, vaIsiraeri ngavaise maoko avo pamusoro pavaRevhi,

¹¹ Aroni obva asimudzira maoko ake achiturira vaRevhi kwandiri Tenzi.

¹² VaRevhi ngavaise maoko avo pamisoro yehandira dziya. Imwe ndeyechibayiro chomupiro wokupfupira zvitadzo. Imwe yacho ichava yomupiro wokupisa inoitirwa kuchenura vaRevhi.

¹³ Ita kuti vaRevhi vabatsire Aroni navanakomana vake. Naizvozvo vaite somupiro unosimudzirwa uchipirwa kuna Tenzi.

¹⁴ Aya ndiwo matsauriro auchaita vaRevhi muvaIsiraeri vachibva vava vangu.

¹⁵ Kana wachenura vaRevhi nokuvaturira kwandiri somupiro unosimudzirwa uchiturirwa Mwari vachava vanhu vanobvumirwa kuita basa romutendhe rokusanganira.

¹⁶ Zvamakatsaura vaRevhi muvaIsiraeri muchivapa kwandiri zvachose vachitora nzvimbo yamatangwe evaIsiraeri, vaRevhi ndavasarudza kuti vave vangu.

¹⁷ Matangwe ose mukati mavaIsiraeri ndeangu, ose avanhu neemhuka paya pandakauraya matangwe ose omuIjipiti ndipo pandakavatsaurira ini pachangu.

¹⁸ Zvino ndava kuzotora vaRevhi panzvimbo yamatangwe avaIsiraeri.

¹⁹ Ndakapa vaRevhi sechipo kuna Aroni navanakomana vake chakabva muvaIsiraeri kuti vaite basa mutendhe rokusanganira vachishandira vaIsiraeri nokuvadzivirira munjodzi dzingavawire kana vakaswedera munzvimbo inoera.”

²⁰ Saka Mosesi naAroni navaIsiraeri vose vakaturira vaRevhi kuna Tenzi sokuudzwa kwakaitwa Mosesi naTenzi.

²¹ VaRevhi vakazvichenura kuzvitadzo, vakasuka hanzu dzavo. Aroni akasimudza maoko ake achivaturira kuna Tenzi. Aroni akapira mipiro yokuchenura vaRevhi.

²² VaIsiraeri vakaita zvose zvakaudzwa Mosesi naTenzi pamusoro pavaRevhi. Mushure maizvozvo vaRevhi vakaenda kundoita basa ravo rokubatsira Aroni navanakomana vake mutendhe rokusanganira.

²³ Tenzi akataurira Mosesi achiti,

²⁴ “Iri ndiro basa ravaRevhi vose vanenge vava namakore makumi maviri namashanu navane anopfuura iwayo ngavaende kundoita basa romutendhe rokusanganira.

²⁵ Kana vava namakore makumi mashanu ngavazorodzwe kuita basa iroro vachirega kuita basa iroro.

²⁶ Ngavabatsire vamwe vavo vaRevhi kuita basa romutendhe rinoera. Asi ngavarege kuita basa iroro vari vose. Ndiwo murongero waunofanira kuita mabasa avaRevhi.”