Mapisarema 6 - Bhaibhiri Idzva rechiShona

Munamato wepanguva yenhamo

Muimbisi, urwu rwiyo rwunoimbwa navane zvokuimbisa zvine tambo dzewaya zvinoimba netambo yechisere yamahon'era. Rumbo rwaDhavhidhi.

¹ TENZI musanditsiure muine hasha, kana kundiranga makashatirwa.

² Ndiitireiwo tsiye nyoro, TENZI nokuti ndapera simba TENZI, ndirapeiwo nokuti mapfupa angu apera basa.

³ Mweya wanguwo wapinda nhamo; asi nhai, TENZI, kusvikira rini chaizvo?

⁴ Dzokai TENZI mundiponese. Ndinunurei pamusana pemwoyochena wenyu.

⁵ Nokuti kana munhu afa haakuyeukei; ndiani angakurumbidzei munzvimbo yavakafa.

⁶ Ndaneta nokuchema, usiku hoga hoga, ndinonyorovesa mubhedha wangu nemisodzi yangu. Ndinonyorovesa uvato hwangu nokuchema kwangu.

⁷ Maziso angu arezuka nokurwadziwa mwoyo; anoshaya simba pamusana pemhandu dzangu dzose.

⁸ Ibvai kwandiri imi vaiti vezvakaipa nokuti TENZI akanzwa izwi rokuhwihwidza kwangu.

⁹ TENZI akanzwa chichemo changu. TENZI akagamuchira munamto wangu.

¹⁰ Vavengi vangu vose vachanyara vagotambudzwa zvinorwadza? Vachadzoka vagonyadziswa pakarepo.