Mapisarema 5 - Bhaibhiri Idzva rechiShona

Munamato wamangwanani wokukumbira kuchengetedzwa

Kumuimbisi anezvokuimbisa zvine hungiso. Rwiyo rwaDhavhidhi.

¹ TENZI, teererai zvandinotaura, rangarirai kuungudza kwangu.

² Inzwai izwi rokuchema kwangu, Mwari wangu naMambo wangu nokuti ndinonamata kwamuri.

³ TENZI, mangwanani, munonzwa izwi rangu. Kumangwanani, ndinokugadzirirai chibayiro ndomirira.

⁴ Nokuti hamusi Mwari anofarira uipi, uipi haugone kuita musha pamwechete nemi.

⁵ Vanozvikudza havangagoni kumira pamberi penyu, munovenga vaiti vose vezvakaipa.

⁶ Munoparadza vanotaura nhema TENZI anovenga vanhu vanoda kudeura ropa navanhu vanonyengedza.

⁷ Asi pamusana pemwoyochena wenyu wakawanda; ndichapinda mumba menyu. Ndichanamata ndichikuremekedzai ndakaringira kuTemberi yenyu inoera.

⁸ Nditungamirireiwo TENZI, nokururama kwenyu, nokuti ndine mhandu. Ndijekesereiwo nzira yamunoda kuti ndifambe nayo.

⁹ Nokuti hapana chavanotaura chechokwadi. Zviri pamwoyo pavo chaizvo ndezvokuda kuparadza; gurokuro ravo iguva rakashama vanonyengedza norurimi rwavo.

¹⁰ Ngavabatwe nemhosva yavo, Mwari. Zvavakarangana izvozvo zvivaputsire pasi. Pamusana pezvikanganiso zvavo zvakawanda, vadzingei nokuti vakakupandukirai.

¹¹ Asi vanopotera mamuri ngavafare, varambe vachiimba nomufaro. Imiwo vadzivirirei, kuitira kuti vanoda zita renyu vapembere nokufara mamuri.

¹² Nokuti imi TENZI munokomborera mururami, munomudzivirira senhoo nemweya wenyu wakanaka.