Mapisarema 21 - Bhaibhiri Idzva rechiShona

Muimbisi, urwu rwiyo rwaDhavhidhi.

Rumbo rwokukurira

¹ Mambo anofara nesimba renyu, TENZI, anofarira zvikuru kuponesa kwenyu.

² Makamupa zvaiva pamwoyo pake uye hamuna kumunyima zvaakakumbira nomuromo wake. Dzepfunde

³ Makamuchingura nezvikomborero zvakanaka mukamugadza chiremba chendarama chakanakisisa mumusoro make.

⁴ Akakukumbirai upenyu mukamupa, mazuva akawanda nokusingaperi.

⁵ Ano mukurumbira mukuru pamusana porubatsiro rwenyu rwunoponesa. Makamupa umambo norukudzo.

⁶ Nokuti makaisa zvikomborero zvenyu paari nokusingaperi uye anofara nokuvapo kwenyu

⁷ nokuti mambo anovimba naTENZI uye haambosudurutswa pamusana pemwoyochena wanyakumusorosoro.

⁸ Ruoko rwenyu ruchabata vavengi venyu vose. Ruoko rwenyu ruchabata vanokuvengai.

⁹ Muchavaita sevira romoto pamuchazviratidza TENZI achavamedza nehasha dzake, vacharoromeswa nomoto.

¹⁰ Muchaparadza vana vavo panyika uyewo vana vavo pakati pavanhu.

¹¹ Kana zvavo vakafunga zvakaipa zvokukuitirai, kana vakaronga mazano akaipa havambobudirira

¹² nokuti muchavamhanyisa makanongedza uta hwenyu kuuso hwavo.

¹³ Munofanira kurumbidzwa zvenyu, imi TENZI, pamusana pesimba renyu. Tichaimba tichirumbidza simba renyu.