Mapisarema 19 - Bhaibhiri Idzva rechiShona

Muimbisi, urwu Rwiyo rwaDhavhidhi.

Kunaka kwakaita zvisikwa nemirao yaMwari

¹ Matenga anoparidza mbiri yaMwari, ziendanakuenda rinodura pachena mabasa aMwari.

² Zuva roga roga rinotaura kusvika kune rimwe, nousiku humwe hunotsvitsa kunohumwe ruzivo irworwu.

³ Hapana kutaura kana mashoko kana izwi rawo rinonzwika.

⁴ Asi izwi rawo rinosvika pasi pose, mazwi avo anosvika kwakaperera nyika, akaitira zuva musha maari

⁵ rinobuda somukuwasha mumba make somurume ane simba, rinomhanya nzira yaro norufaro.

⁶ Rinobuda kwakaperera denga richifamba kundosvika kumwe kwarinogumira. Hakuna chingavande kupisa kwaro.

⁷ Mutemo waTENZI mutemo uzere, unomutsiridza munhu. Kupupurira kwaTENZI ndokwechokwadi, kunopa ungwaru kuna vasina njere.

⁸ Zvirongwa zvaTENZI zvakarurama, zvinofadza mwoyo. Murau waTENZI mutsvene tsvene unovhenekera maziso.

⁹ Kutya Mwari chinhu chakachena, chinogara nokusingaperi mitemo yaTENZI iri pachokwadi uye yakarurama kwazvo.

¹⁰ Inofanira kudiwa kukunda ndarama, kutopinda ndarama yakanakisisa, inotapirawo kupinda uchi kupinda musvisvi wezinga rouchi.

¹¹ Uyewo unoyambira muranda wenyu kuichengeta kunowanisa mubayiro mukuru.

¹² Asi ndiani angaone zvikanganiso zvake; ndicheneseiwo kunezvikanganiso zvakavanda.

¹³ Ndidzivirireiwo ini muranda wenyu kuzvitadzo zvokuita ndichida. Ngazvirege kunditonga. Naizvozvo ndichava munhu asina mhosva uye asina kupara mhosva huru.

¹⁴ Dai mazwi angu nepfungwa dzemwoyo wangu zvangove zvinogamuchirika kwamuri, imi TENZI, bako rangu nomununuri wangu.