Mapisarema 15 - Bhaibhiri Idzva rechiShona

Rwiyo rwaDhavhidhi.

Ndiani angave muenzi waMwari

¹ TENZI ndiani angagare mutendhe renyu? Ndiani angagare mugomo renyu rinoera?

² Munogarwa nomunhu ano upenyu huri pachokwadi, anoita zvakarurama uye anotaura chokwadi chake chaicho chinobva mumwoyo;

³ munhu asingatauri makuhwa norurimi rwake; asingaitiri mumwe wake zvakaipa; asingatauri zvakaipa zvavamwe.

⁴ Munhu anozvidza munhu akashata; asi anoremekedza vanoremekedza TENZI, anochengeta zvaanenge apika kuita kunyange zvichirwadza.

⁵ Anokweretesa asingati akwereta ngaaise imwe mari pamusoro payo kana kutambira chioko muhomwe chokurwisa munhu asina mhosva. Munhu anoita zvakadai haatsukunyiki.