3 यूहन्ना 1 - सादरी नवाँ नियम1 इ चिट्ठी मोंय यूहन्ना बटले हेके जे कलीसिया केर अगुवा हेकों। मोंय इ चिट्ठी मोर दुलारा संगी गयुस केर नाँव से लिखाथों जेकर से मोंय सच्चा प्रेम करोना। 2 हे दुलारा संगी, मोर इ प्रार्थना हेके कि जइसन तोंय आत्मिक उन्नति कराथिस तइसनेहें तोंय सोउब गोइठमन में उन्नति कर आउर भला चंगा रहबे। 3 काले कि जब थोरेक बिसवासी भाईमन आय के हमरेमन के बतालैं कि तोंय परमेश्वर केर डहर में सच्चाई से चलिसला, तो मोंय ढेइर हें खुश होलों। 4 मोके आउर कोनों गोइठ से एतना खुशी नी होतक जेतना इ सुइन के कि मोर छउवामन सच्चाई केर डहर में चलैना। गयुस केर बड़ाई 5 हे मोर दुलारा संगी, तोंय हमरेमन केर बिसवासी भाईमन के ढेइर चीजमन से मदइत कराथिस, हिंयाँ तक कि उमन केर हों मदइत कराथिस जेमन के तोंय नी जानिसला। 6 उमन हिंयाँ केर कलीसिया केर सामने तोर प्रेम केर गवाही देई हैं। अगर तोंय उमन के जेमन तोर ठिना आवैना, ओहे लेखे बिदा करबे जे लेखे परमेश्वर केर आदमीमन के करेक उचित अहे, तो तोंय बेस काम करबे। 7 काले कि उमन अलग-अलग ठाँव में इ लगिन जाथैं, ताकि यीशु मसीह केर बारे में आदमीमन के बताएक पारोक, उमन अबिसवासीमन से कोनों मदइत नी लेवैना। 8 से लगिन हमरेमन के एइसन आदमीमन केर मदइत करेक चाही, ताकि जब उमन सच्चाई केर घोषना करबैं तो हमरेमन हों उकर में उमन संगे साझादार बनेक पारब। दियुत्रिफेस आउर दिमेत्रियुस 9 मोंय आगे हों कलीसिया केर बिसवासीमन के इ चिट्ठी लीख रहों, मगर दियुत्रिफेस मोर गोइठमन के मानेक से मना करेला काले कि उ खुद कलीसिया केर अगुवा बनेक चाहेला। 10 से लगिन जब मोंय आमूँ तो कलीसिया केर आदमीमन से गोठियामूँ कि उ का-का काम कराथे। उ हमरेमन केर उपरे बुरा-बुरा काम करेक केर दोष लगायला। एतना हें निहीं उ खुद बिसवासी भाईमन केर हों स्वागत नी करेला, मगर जेमन उमन केर स्वागत करेक चाहैना, उमन के हों मना करेला आउर हिंयाँ तक कि उ उमन के कलीसिया से बाहरे निकलाय देवेला। 11 हे दुलारा संगी, उमन केर नकल ना करबे जेमन बुरा काम करैना, मगर उमन केर नियर चलबे जेमन भलाई केर काम करैना। जे भलाई करेला उ परमेश्वर केर संतान हेके मगर जे बुराई करेला उ परमेश्वर के नी जानेला। 12 कलीसिया में सोउब केऊ कहैना कि देमेत्रियुस एगो बेस आदमी हेके काले कि उकर ब्यवहार परमेश्वर केर बचन केर मोताबिक अहे। आउर हमरेमन हों गवाही देवीला कि उ बेस आदमी हेके आउर तोंय जानिसला कि हमरेमन केर गवाही सच हेके। आखरी जोहार 13 मोके आउर हें ढेइर गोइठमन के तोके लिखेक रहे, मगर मोंय सियाही आउर कलम से लिखेक नी चाहोना। 14 मोके आसरा अहे कि मोंय तोर से जल्दी हें भेंट करमूँ तब हमरेमन आमने सामने गोठियाब। 15 मोंय प्रार्थना करोना कि तोके शांति मिलते रहोक। हिंयाँ केर संगमन तोके जोहार कहैना। हूवाँ केर संगमन के नाँव लेई-लेई के जोहार कइह देबे। |
Sadri Bible by The Love Fellowship is licensed under Creative Commons Attribution-ShareAlike 4.0 License.
Beyond Translation