Markos 10 - Saaho Cusub Cahde

Aydaras fittix sabbatah

¹ Kafarnaxuumko uguteh lel Yordaanos tabso kin Yahuudiyaati zoobälle yedeeyaako, mango xiyaw malammih alle yekettin. Malammih lel ishi baso balih lel ten yuyduruse.

² Faarisiin lel alle yemeetinyaako kaa yacakkanoona ciloh: “Labhatti ishi numa yaftixem arax kinni?” yerhxiinih kaa esseren.

³ Usuk lel: “Moosa ayim sin yeemere?” akko yerhxe.

⁴ “Moosa, labhatti fittix warqat akah yuktubeh tee dhirhiyo yismixe” akko yerhxin.

⁵ Yeesus lel: “Usuk ta amre sinah yuktubem sin afcaadot tiraarehi sabbatah kinni.

⁶ Laakin erherh makhaaliqhooko: ‘Yalli labtiya kee saytiya akko abeh kinni ten yukhluqhem.’

⁷ ‘Amaydo, xiyawti ishi abba kee ishi ina xabah ishi numaalih inketta yakke,

⁸ lammik lel inki xazotta yakkin’. Amaydo, usun kamboh lamma makinooniiki, inki xazotta kinon.

⁹ Yalli inkidde yezgelleh yane mara, xiyawti barhishe wayo” yerhxeh alle yedebbe.

¹⁰ Katattaynit lel malammih caredde ta gondoh sabbatah kaa esseren.

¹¹ Usuk lel: “Ishi numa yaftixeh akettö marcishitinnanti zina aba,

¹² ishi lel ishi baclaako timfittixeh akettodde marcishimtemko, zina abta” akko yerhxe.

Cindham yolle yamaatoona

¹³ Usuk ten dhago ciloh irro alle baahak yinin, katattaynit lel ten yoskoolofin.

¹⁴ Yeesus laakin tayim yuble gedda, yixriqheyaako: “Yallih nigsinna ta gina-le marah kinnik, cindham yolle yamaatoonaaki ten mideesina.

¹⁵ Cindham balih Yallih nigsinna kabbaatinnixeti, teyadde orobo makinam rummah sinak arhxiyuk ane” akko yerhxe.

¹⁶ Ishi xaruudde ten hayeh dhaaco akah abeyaako, ishi gabub alle haye.

Gaddaale kin gufaa

¹⁷ Yeesus ishi kallaaxeh aduuk, wuli xiyawti arduk yemeeteh kaa nifille gululluubuweyaako: “Mece Mudarriso, umman geedit aniina awarasho ayim abo yolle tane?” yerhxeh kaa essere.

¹⁸ Yeesus lel: “Aymihi mece tiya yok tarhxem? Yallaako bextih meceti miyane.

¹⁹ Atu amre taarhige: ‘Magdafin, maznayin, migaracin, zirabah mashhadin, mangar mibeetin, ishi abba kee ishi ina xishmat’” akko yerhxe.

²⁰ Usuk lel: “Mudarris, tayim inkoh cindhiiko ibbirheh aniyo” akko yerhxe.

²¹ Yeesus lel, kulux adde yerhxeyaako, kaa yikxineh: “Inki xaaja kok tunquseh tane: tedeeh, litom inkoh teebexeh baaxentah uxuu, carshelle lel cukra taallo kito, amowaaki lel yi kataa” akko yerhxe.

²² Usuk naba gadda luuk yinemhi sabbatah, ta waani yoobbeh mangum axzinuk yedee.

²³ Yeesus, gura-mizgalle kulux-yerhxeyaako ishi katattaynitik: “Ta gadda-le mari Yallih nigsinnadde orobaanam ayidhdha akko tasrawo kinni!” akko yerhxe.

²⁴ Katattaynit lel kaa waanille cibrah raben. Yeesus laakin malammih: “Cindhaamo, Yallih nigsinnadde orobaanam ayidhdha siriya!

²⁵ Gaddaale kin xiyawti Yallih nigsinnadde orobamko gaalatti ibrat intiiko tillaabam akko ruhuwa” akko yerhxe.

²⁶ Usun ziyaada cibrah rabeenih: “Miyatto kinni haye gargeerimo leti?” akko yerhxin.

²⁷ Yeesus lel tenadde kulux-yerhxeyaako: “Tayim xiyawti dhiicam maki, Yalli laakin ummannim dhiica. Amayim lel Yallah ummannim akah takkemhi sabbatah kinni” akko yerhxe.

²⁸ Bithroos lel: “Ubul, ummannim xabneh ku katayneh nane” akko yarhxo erherhishe.

²⁹ Yeesus: “Yotta kee Mece Wareh arhxuk care, hido sacul, hido saculte, hido ina, hido abba, hido irro, hido dhage xabeyaako,

³⁰ ta waqhtedde bool waqhtiya carwa, sacul, saculte, inon, cindham kee dhageg hadaanoolih kabbaate wayo leti, yamiite waqhtedde lel umman geedit aniina wayo leti inkinnah miyane.

³¹ Laakin, afti gabo yane mango mari sarradde, sarradde yane mari lel afadde gaxoona kinoonim rummah sinak arhxiyuk ane” akko yerhxe.

Yeesus maddaxih ishi rabi yaakumeh warisha

³² Katattaynit Yerusaalemille yayyaace araxalle aduuk, Yeesus ten afadde gerhak yine. Usun cibrah raben. Aki xiyaw kaa kataa tineya lel mashshiiten. Amaa lamman kee taman malammih isheelih beyeyaako ayim alle takko kinam akah warisho erherhishe:

³³ “Ubula, Yerusaalem fanah awcuk nane. Xiyawti Barha lel sheekhat manabottit kee sercat dhiiceenitille kaa yasxawna kinon, usun lel rabih kaa yiqhtsiciinih Aki-maralle kaa yasxawna kinon.

³⁴ Usun lel alle tsaggarowoona kee thuf alle yerhxiinih khormaaajah kaa sabacenyaako kaa yagdafoona kinon. Usuk lel maddaxit lellec rabaako uguto kinni” akko yerhxe.

Yacqoob kee Yohannis essero

³⁵ Zibdit cindham kin Yacqoob kee Yohannis alle yemeetinyaako: “Mudarris, ku esserinnannim noh abto kok farhak nane” akko yerhxin.

³⁶ Usuk lel: “Ayim sinah abo yok fadhdhaana?” akko yerhxe.

³⁷ Usun lel: “Ku nabnelle, tiyak mizgaako, tiyak lel guraako defeyno noh ismix” akko yerhxin.

³⁸ Yeesus: “Ayim esserak taniinim aarhiguk mitaniini. Anu aacube kobbaaya taacaboona dhictaana, hido lel anu akah anthimmiqhe anthammaqhah tanthammaqhoona dhictaana?” akko yerhxe.

³⁹ Usun lel: “Dhicna” akko yerhxin. Yeesus lel: “Anu aacube kobbaaya taacaboona kitin, anu akah anthimmiqhe anthammaqhah lel tanthammaqhoona kitin,

⁴⁰ yi mizga kee yi guraakohi defeena laakin, yotta maki yasmixetiiki, tamaa akah tinqirribe marah kinni” akko yerhxe.

⁴¹ Amaa taman tayim yoobbin gedda, Yacqoob kee Yohannisille alle kurrayen.

⁴² Yeesus akah deecimeh lel: “Aki-mara ten reezonuh yamidhdhige mari ten bukalle maddaritih yamidhdhigiinim kee ten makaabun ten bukalle reeza abaanam taarhigin.

⁴³ Sin fanadde laakin tayim takko alle mitane. Sinadde naba tiya akkinnanti lel sin khaddaam yakko alle tane.

⁴⁴ Sinadde erhedhdho akkinnanti umman tiyahi garuzzo yakko alle tane.

⁴⁵ Amayim lel Xiyawti Barhi gantah akah yakhdamoona makiiki, yakhdamo kee mango marih muucah ishi aniina tillaabisho yemeetemhi sabbatah kinni” akko yerhxe.

Yeesus inti-male kin Bartimaayos urusa

⁴⁶ Usun Yerikholle yemeetin. Yerikhooko aduuk ishi katattaynit kee mango xiyawlih aduuk, Timaayos barha kin Bartimaayos, inti-male kin caageena kinya, arax afakke defeyak yine.

⁴⁷ Usuk Naazret Yeesus kinam yoobbe gedda: “Yeesus, Dawud Barha, yolle raxmat!” arhxuk zeere.

⁴⁸ Mango mari lel sik-erhex yerhxiinih kaa yoskoolofin. Usuk laakin amayimko ziyaada: “Dawud Barha, yolle raxmat!” yerhxeh zeere.

⁴⁹ Yeesus lel daw-yerhxeyaako: “Akah deecima” yerhxe. Usun lel amaa inti-maleh akah deecimeenih: “Aydukum-erhex, koh deecimak yanek ugut” akko yerhxin.

⁵⁰ Usuk lel ishi natsala cideh, ugut-yerhxeyaako Yeesus fanah yemeete.

⁵¹ Yeesus lel: “Ayim koh abo yok fadhdha?” akko yerhxe. Amaa inti-mali lel: “Mudarris, malammih ablo farha” akko yerhxe.

⁵² Yeesus lel: “Ku imaan ku gargeereh yanek, isheh aduu” akko yerhxe. Usuk lel akkanih ishi mablo geyeyaako, araxadde kaa kataye.