Micah 1 - ბიბლია

¹ უფლის სიტყვა, რომელიც იყო მორეშეთელი მიქას მიმართ იუდას მეფეების: იოთამის, ახაზის და ხეზეკიას დროს, და რომელიც გამოეცხადა სამარიისა და იერუსალიმის გამო.

² ისმინეთ, ყველა ხალხებო! გაიგონოს დედამიწამ და მისმა ყოველმა სულდგმულმა! უფალი ღმერთი იყოს მოწმე თქვენს წინააღმდეგ, უფალი თავისი წმიდა ტაძრიდან.

³ რადგან, აჰა, უფალი გამოდის თავისი ადგილიდან, ჩამოდის და შედგება დედამიწის სიმაღლეებზე.

⁴ მთები დნებიან მის ქვეშ და ველები იღვენთებიან, როგორც ცვილი იღვენთება ცეცხლის სიახლოვეს, როგორც წყლები ცვივიან ქარაფებიდან.

⁵ იაკობის უკეთურების გამოა ეს ყველაფერი და ისრაელის სახლის ცოდვის გამო. რა არის იაკობის უკეთურება? სამარია ხომ არა? რა არის იუდას გორაკი? იერუსალიმი ხომ არა?

⁶ ველზე დაყრილ ნანგრევებად ვაქცევ სამარიას, ვაზის გასაშენებელ ადგილად; ველზე გადავყრი მის ქვებს და ამოვაგდებ მის საძირკველს.

⁷ ყველა მისი კერპი დაიმსხვრევა, ყოველი მისი სიძვით მოგებული ცეცხლში დაიწვება, და გავანადგურებ ყველა მის ქანდაკს, რადგან სიძვის სასყიდლით აგროვებდა მათ, ამიტომაც სიძვის სასყიდლად იქცევიან.

⁸ ამაზე ვიგლოვებ და ვიტირებ, ფეხშიშველი და დედიშობილა ვივლი; ტურასავით ვიკივლებ და სირაქლემასავით ვიკვნესებ.

⁹ რადგან უკურნებელია მისი ჭრილობები, რადგან მიადგა იუდას; და ჩემი ერის კარიბჭეს – იერუსალიმსაც – უწია.

¹⁰ ნუ გამოაცხადებთ ამას გათში, მოთქმას ნუ გამართავთ იქ! მიწა-მტვერში გაგორდით ბეთ-ლეყაფრაში.

¹¹ ჩაიარე შენთვის, შაფირელო, სამარცხვინო სიშიშვლეში! ვერ დააღწევს თავს ცაანანელი, ბეთ-ეცელში გლოვა არ დაგაყენებთ.

¹² რადგან წუხს თავის დოვლათზე მაროთელი დიაცი, რადგან უბედურებამ ჩამოაღწია უფლისგან იერუსალიმის კარიბჭემდე.

¹³ შეაბი ეტლში ბედაურები, ლაქიშელო, შენ – სიონის ასულის ცოდვის დასაბამო, რადგან შენ გამოგაჩნდა ისრაელის უღმრთოებანი!

¹⁴ ამიტომ შენ გაუგზავნი განტევების საჩუქარს მორეშეთ-გათს. აქზიბის სახლები მაცდუნებლად ექცევიან ისრაელის მეფეებს.

¹⁵ ახალ პატრონს მოგაყენებ, მარეშელო დიაცო, ყადულამს მიაღწევს ისრაელის დიდება.

¹⁶ თმა გადაიკრიჭე, გადაიპარსე სანუკვარი შვილების გამო, სვავივით მოიტვლიპე, რადგან გადაასახლებენ მათ შენგან.