Joel 1 - ბიბლია

¹ სიტყვა უფლისა, რომელიც იყო იოელ ფეთუელის ძის მიმართ.

² ისმინეთ ეს, უხუცესნო, ყურად იღეთ ქვეყნის ყველა მკვიდრნო! თუ მომხდარა ეს თქვენს დროს ან თქვენი მამების დროს?

³ გადაეცით თქვენს შვილებს ამის თაობაზე, თქვენმა შვილებმა თავიანთ შვილებს გადასცენ, მათმა შვილებმა კი – მათ შემდგომ თაობას:

⁴ რაც მუხლუხოს გადაურჩა კალიამ მოჭამა, რაც კალიას გადაურჩა კუტკალიამ მოჭამა, რაც კუტკალიას გადაურჩა ბოცომკალმა მოჭამა.

⁵ გაიღვიძეთ, ლოთებო, იტირეთ და ივალალეთ, ღვინის მსმელნო, მაჭარზე, ბაგეთაგან რომ აგაცალეს!

⁶ რადგან მოადგა ჩემს ქვეყანას ძლიერი და ურიცხვი ხალხი. კბილები მისი – კბილები ლომისა, ყბები მისი – ყბები ძუ ლომისა.

⁷ გამიჩანაგა ვენახი და შემიმუსრა ლეღვიანი, გაყვლიფა და მიაგდო; გაუფითრდა რტოები.

⁸ იტირე ძაძით მოსილი ყმაწვილქალივით, თავისი სიქალწულის ქმარს რომ დასტირის!

⁹ შეწყდა პურეულის ძღვენი და საღვრელი უფლის სახლში; გოდებენ მღვდლები, უფლის მსახურნი.

¹⁰ გაჩანაგდა ყანები, გოდებს მიწა, რადგან გაოხრდა ხორბალი, გაშრა მტევანში წვენი, გახმა ზეთისხილი.

¹¹ გაწბილდნენ მხვნელ-მთესველნი და მეზვრენი, აღარაა ხორბალი და ქერი, მთელი მოსავალი დაიღუპა.

¹² გადახმა ვაზი და ჩამოჭკნა ლეღვი; გახმა ბროწეული, ფინიკი და ვაშლი და ველის ყველა ხე. ამიტომაც გაუქრა სიხარული ადამის ძეს.

¹³ შემოირტყით ჯვალო და იგლოვეთ, მღვდლებო! ივალალეთ, სამსხვერპლოს მსახურნო! შემოდით, ჯვალოში გაათიეთ ღამე, ჩემი ღვთის მსახურნო! რადგან შეწყდა თქვენი ღვთის სახლში პურეულის ძღვენი და შეწყდა საღვრელი.

¹⁴ დათქვით წმიდა მარხვა, გამოაცხადეთ საზეიმო შეკრებილობა; შეკრიბეთ უხუცესნი, ქვეყნის ყოველი მკვიდრი, უფლის, თქვენი ღმერთის, სახლში და უფალს შეღაღადეთ.

¹⁵ ვაი, ჩვენს დღეს! რადგან ახლოსაა უფლის დღე და მოდის ყოვლადძლიერისაგან როგორც განადგურება.

¹⁶ განა თვალწინ არ წარგვტაცეს საზრდო, და სიხარული და ლხინი ღვთის სახლიდან?

¹⁷ ჩალპა მარცვალი ბელტებს ქვეშ, დაცარიელდა კალოები, დაინგრა ბეღლები, რადგან გადახმა ყანები.

¹⁸ როგორ კვნესის პირუტყვი! დაღონებული დადის ნახირი, რადგან აღარა აქვს საძოვარი; ცხვრის ფარებსაც ილაჯი გაუწყდა.

¹⁹ შენ შემოგღაღადებ, უფალო, რადგან ცეცხლმა გადაჭამა უდაბნოს საძოვრები, ალმა გადაბუგა ველზე ყოველი ხე.

²⁰ ველის ნადირიც შენ შემოგყურებს, რადგან დაიშრიტა წყლის სათავეები და ცეცხლმა გადაჭამა უდაბნოს საძოვრები.