იობი 1 - ბიბლია

¹ ცხოვრობდა ყუცის ქვეყანაში კაცი, სახელად იობი. და იყო ის უმწიკვლო და მართალი, ღვთისმოშიში და უკეთურებას განრიდებული კაცი.

² და შეეძინა მას შვიდი ძე და სამი ასული.

³ და ჰყავდა მას: 7 ათასი ცხვარი, 3 ათასი აქლემი, 500 უღელი ხარი, 500 ჭაკი ვირი, და უამრავი მსახური; და იყო ეს კაცი ყველაზე მდიდარი აღმოსავლეთის მკვიდრთა შორის.

⁴ მისი ძენი მონაცვლეობით მართავდნენ ნადიმებს თავიანთ სახლებში და სტუმრობდნენ ერთმანეთს. და წარგზავნიდნენ და იწვევდნენ სამ დასაც, რათა მათთან ერთად ესვათ და ეჭამათ.

⁵ ნადიმის დღეები რომ დამთავრდებოდა, იობი წარგზავნიდა და განწმედდა მათ: ადგებოდა დილაადრიან და სრულადდასაწველს აღავლენდა მათი რიცხვის მიხედვით, რადგან ამბობდა: „ეგებ შესცოდეს ჩემმა შვილებმა და დაგმეს ღმერთი თავინთ გულში.“ ყოველთვის ასე იქცეოდა იობი.

⁶ ერთ დღეს მივიდნენ ღვთის შვილები უფლის წინაშე წარსადგომად, და ეშმაკიც მივიდა მათ შორის.

⁷ ჰკითხა უფალმა ეშმაკს: „საიდან მოდიხარ?“ მიუგო ეშმაკმა უფალს: „ქვეყნაზე აღმა-დაღმა ხეტიალიდან.“

⁸ და კვლავ ჰკითხა უფალმა ეშმაკს: „თუ შეგინიშნავს ჩემი მსახური იობი? არავინ არის მისი მსგავსი ამ ქვეყანაზე: უმწიკვლო და მართალი, ღვთისმოშიში და უკეთურებას განრიდებული.“

⁹ ეშმაკმა კი მიუგო უფალს: „მერედა განა ტყუილად არის იობი ღვთისმოშიში?

¹⁰ განა შენ არ იცავ მას ყოველმხრივ, მთელი მისი სახლ-კარითა და სარჩო-საბადებლითურთ? შენგან არის კურთხეული მისი ნახელავი, ხოლო მისი საქონელი გამრავლებულია ქვეყნად.

¹¹ აბა, გაიწოდე ხელი და შეეხე მთელ მის სარჩო-საბადებელს, თუ პირში გმობას არ დაგიწყებს.“

¹² და უთხრა უფალმა ეშმაკს: „აჰა, შენს ხელთ იყოს მთელი მისი სარჩო-საბადებელი, ოღონდ თავად მას ნუ შეეხები!“ და გაშორდა ეშმაკი უფალს.

¹³ ერთ დღეს, როცა მისი ძენი და ასულნი ჭამდნენ და ღვინოს სვამდნენ თავიანთი უფროსი ძმის სახლში,

¹⁴ მაცნე მოვიდა იობთან და უთხრა: „ხარები ხნავდნენ, სახედრები კი მათ გვერდით ძოვდნენ;

¹⁵ და დაეცნენ შებაელნი მათ და გაირეკეს, მსახური ბიჭები კი მახვილით ამოხოცეს. მეღა გადავრჩი ამბის მომტანი.“

¹⁶ ამის ლაპარაკში იყო, რომ მოვიდა სხვა და უთხრა: „ღვთის ცეცხლი ჩამოვარდა ზეციდან, ცხვარი და მსახური ბიჭები გადაბუგა და შთანთქა. მეღა გადავრჩი ამბის მომტანი.“

¹⁷ ამის ლაპარაკში იყო, რომ მოვიდა კიდევ სხვა და უთხრა: „ქალდეველნი დაეწყვნენ სამ რაზმად, დაეცნენ აქლემებს და გაირეკეს ისინი, მსახური ბიჭები კი მახვილით ამოხოცეს. მეღა გადავრჩი ამბის მომტანი.“

¹⁸ ამის ლაპარაკში იყო, რომ მოვიდა კიდევ სხვა და უთხრა: „შენი ძენი და ასულნი ჭამდნენ და ღვინოს სვამდნენ თავიანთი უფროსი ძმის სახლში,

¹⁹ და ამ დროს დიდი ქარი მოვარდა უდაბნოდან, ეკვეთა სახლის ოთხსავე კუთხეს, ჭერი თავზე დაემხოთ ყმაწვილებს და დაიხოცნენ. მეღა გადავრჩი ამბის მომტანი.“

²⁰ ადგა იობი, შემოიხია სამოსი, გადაიპარსა თავი, დაეცა მიწაზე და თაყვანი სცა,

²¹ და თქვა: „შიშველი გამოვედი დედის მუცლიდან და შიშველივე მივიცევი უკან. უფალმა მომცა და უფალმავე წაიღო. კურთხეულ იყოს უფლის სახელი.“

²² ყოველივე ამაში არ შეუცოდავს იობს, ღმერთის აუგი არ დასცდენია.