Jeremiah 1 - ბიბლია

¹ სიტყვები იერემიასი, ხილკიას ძისა, იმ მღვდელთაგანისა, რომლებიც ყანათოთში იყვნენ, ბენიამინის მიწაზე.

² რომლის მიმართაც იყო უფლის სიტყვა იუდას მეფის იოშია ამონის ძის დროს, მისი მეფობის მეცამეტე წელს,

³ და იუდას მეფის იეჰოიაკიმ იოშიას ძის დროს, და იუდას მეფის იოშიას ძის, ცედეკიას მეთერთმეტე წლის ბოლოს, იერუსალიმის ტყვეობამდე, მეხუთე თვეს.

⁴ იყო უფლის სიტყვა ჩემს მიმართ ნათქვამი:

⁵ „სანამ გამოგსახავდი დედაშენის მუცელში, მე გიცნობდი შენ, და სანამ გამოხვიდოდი დედის საშოდან, მე წმიდა-გყავ შენ და ხალხების წინასწარმეტყველად დაგადგინე.“

⁶ მე ვუპასუხე: „ეჰ, უფალო, ღმერთო! მე არ ვიცი ლაპარაკი, რადგან ყმაწვილი ვარ.“

⁷ და მითხრა მე უფალმა: „ნუ ამბობ: ყმაწვილი ვარო, რადგან, საითაც კი მიგავლენ, უნდა წახვიდე და, რასაც გიბრძანებ, ყოველივე უნდა ილაპარაკო.

⁸ ნუ შეგეშინდება მათი, რადგან შენთანა ვარ შენს გადასარჩენად,“ – ამბობს უფალი.

⁹ და გამოიწოდა უფალმა ხელი და შეეხო ჩემს ბაგეებს, და მითხრა მე უფალმა: „აჰა, ბაგეებში ჩაგიდე ჩემი სიტყვა.

¹⁰ იცოდე, მე დღეს დაგაყენე შენ ხალხებსა და სამეფოებზე, რათა აღმოფხვრა და შემუსრო, მოსპო და დაანგრიო, ააშენო და დარგა.“

¹¹ და იყო უფლის სიტყვა ჩემს მიმართ ნათქვამი: „რას ხედავ შენ, იერემია?“ და ვუთხარი მე: „ნუშის ხის კვერთხს ვხედავ.“

¹² და მითხრა მე უფალმა: „კარგად ხედავ, რადგან მე ვჩქარობ ჩემი სიტყვის შესრულებას.“

¹³ და იყო უფლის სიტყვა ჩემს მიმართ მეორედ: „რას ხედავ შენ?“ და ვუთხარი: „მოთუხთუხე ქვაბს ვხედავ, ჩრდილოეთიდან რომ ეშვება.“

¹⁴ და მითხრა მე უფალმა: „ჩრდილოეთიდან დაატყდება უბედურება ამ ქვეყნის ყველა მკვიდრს.

¹⁵ რადგან მე მოვუხმობ ჩრდილოეთის სამეფოების ყველა ტომს, – ამბობს უფალი, – და მოვლენ და დადგამს თითოეული თავის ტახტს იერუსალიმის კარიბჭეესთან, მისი კედლების ირგვლივ, ყველგან, იუდას ყველა ქალაქში.

¹⁶ განაჩენს გამოვუტან ყველა მათი ბოროტების გამო, რადგან მიმატოვეს მე და სხვა ღმერთებს უკმევდნენ და თავიანთ ნახელავს სცემდნენ თაყვანს.

¹⁷ შენ კი შემოისარტყლე წელი, ადექ და უთხარი ხალხს ყოველივე, რასაც მე გიბრძანებ, ნუ შეგეშინდება მათი, რომ არ დაგამხო მათ წინაშე.

¹⁸ მე გაქციე შენ დღეს გამაგრებულ ქალაქად, რკინის სვეტად და ბრინჯაოს ზღუდედ მთელი ამ ქვეყნის წინააღმდეგ, იუდას მეფეების, მისი მთავრების, მისი მღვდლებისა და მთელი ქვეყნის ხალხის წინააღმდეგ.

¹⁹ და შეგებრძოლებიან ისინი, მაგრამ ვერ გძლევენ, რადგან მე შენთანა ვარ – შენს გადასარჩენად!“ – ამბობს უფალი.