Haggai 1 - ბიბლია

¹ დარიოს მეფის მეორე წელს, მეექვსე თვის პირველ დღეს იყო უფლის სიტყვა ანგია წინასწარმეტყველის პირით ნათქვამი იუდას განმგებლის – ზერუბაბელ შეალთიელის ძის და მღვდელმთავარ იესო იეჰოცადაკის ძის მიმართ:

² ასე თქვა ყოვლისმპყრობელმა უფალმა: ეს ხალხი ამბობს, რომ უფლის სახლის აშენების ჟამი ჯერ არ დამდგარაო.

³ და იყო უფლის სიტყვა ანგია წინასწარმეტყველის პირით ნათქვამი:

⁴ იმის ჟამი კი არის, რომ გადახურულ სახლებში ნებივრობდეთ, მაშინ, როცა ჩემი სახლი მიტოვებულია?

⁵ ახლა ასე ამბობს ცაბაოთ უფალი: დაუკვირდით თქვენს გზებს.

⁶ თქვენ ბევრს თესავთ, მაგრამ ცოტას იმკით; ჭამთ, მაგრამ ვერ ძღებით; სვამთ, მაგრამ ვერ იკლავთ წყურვილს; იცვამთ, მაგრამ ვერ თბებით; შრომობთ, მაგრამ გახვრეტილ ჯიბეს ვერ ავსებს თქვენი შრომის საზღაური.

⁷ ასე ამბობს ცაბაოთ უფალი: დაუკვირდით თქვენს გზებს.

⁸ ადით მთაზე, აიტანეთ ხე-ტყე და სახლი ააშენეთ. მოვიწონებ ამას და მასში დიდებით გამოვჩნდები, – ამბობს უფალი, –

⁹ ბევრის მოლოდინი გაქვთ, მაგრამ მცირედი გისრულდებათ. რაც სახლში მიგაქვთ, იმასაც ვანიავებ. რატომ? – ამბობს ცაბაოთ უფალი, – იმიტომ, რომ მიტოვებულია ჩემი სახლი, თქვენ კი ყველანი თქვენს სახლებზე ზრუნავთ.

¹⁰ ამიტომ არის, რომ დაგიკავათ ცამ ცვარი და მიწა არ გაძლევთ ნაყოფს.

¹¹ გამოვიხმე გვალვა მიწაზე, მთებზე, ხორბალზე, ღვინოზე, ზეთისხილზე და ყველაფერზე, რასაც მიწა აღმოაცენებს, ადამიანზე, პირუტყვზე და ყოველივე ნაჭირნახულევზე.

¹² ისმინეს ზერუბაბელ შეალთიელის ძემ, იესო იეჰოცადაკის ძემ – მღვდელმთავარმა, და მთელმა დანარჩენმა ხალხმა უფლის, მათი ღვთის, ხმა და ანგია წინასწარმეტყველის სიტყვები, რამდენადაც იგი უფლის, მათი ღმერთის მოვლინებული იყო, და შეეშინდა ხალხს უფლისა.

¹³ უთხრა ანგიამ, უფლის მოციქულმა, ხალხს უფლის მოციქულობის ძალით: მე თქვენთანა ვარ, – ამბობს უფალი.

¹⁴ გააღვიძა უფალმა იუდას განმგებლის, ზერუბაბელ შეალთიელის ძის სული, მღვდელმთავარ იესო იეჰოცადაკის ძის სული და მთელი დანარჩენი ხალხის სული და მივიდნენ და დაიწყეს ცაბაოთ უფლის, მათი ღმერთის, სახლის სამუშაოები.

¹⁵ დარიოსის მეფობის მეორე წლის, მეექვსე თვის ოცდამეოთხე დღეს.