Ezra 1 - ბიბლია

¹ სპარსეთის მეფის, კიროსის, მეფობის პირველ წელს, რათა აღსრულებულიყო იერემიას პირით თქმული უფლის სიტყვა, გააღვიძა უფალმა სული კიროსისა, სპარსეთის მეფისა, და მისცა ბრძანება, გამოეცხადებინათ მთელ მის სამეფოში წერილობითაც და სიტყვითაც:

² „ასე ბრძანებს კიროსი, სპარსეთის მეფე: ქვეყნიერების ყველა სამეფონი მე მომცა უფალმა, ცათა ღმერთმა, და მიბრძანა ავუშენო მას ტაძარი იერუსალიმში, იუდაში.

³ ვინც კი არის თქვენს შორის მისი ხალხიდან, ღმერთი იყოს მასთან, ავიდეს იერუსალიმს, იუდაში, და აშენოს უფლის, ტაძარი, ისრაელის ღმერთისა – იმ ღმერთისა, რომელიც იერუსალიმშია.

⁴ და ყველა დანარჩენს ყველგან, სადაც ის ცხოვრობს, ხელი შეუწყოს იმ ადგილის ხალხმა ვერცხლით, ოქროთი და სხვა ქონებით; პირუტყვითა და ნებაყოფლობითი ძღვენით უფლის ტაძრისთვის, რომელიც იერუსალიმში არის.“

⁵ და ადგნენ იუდასა და ბენიამინის მამისსახლთა თავკაცები, მღვდლები და ლევიანები, და ყველა, ვისაც კი სული გაუღვიძა ღმერთმა, რათა ასულიყვნენ უფლის ტაძრის ასაშენებლად, რომელიც იერუსალიმშია.

⁶ გარდა იმისა, რაც ტაძარში შეწირულობა შედიოდა, ყველა, ვინც მათ ირგვლივ ცხოვრობდა, ეხმარებოდა მათ ყველაფრით: ვერცხლით, ოქროთი და სხვა ქონებით, პირუტყვითა და ძვირფასი საგნებით.

⁷ ხოლო მეფე კიროსმა ბრძანა, გამოეტანათ უფლის ტაძრის ჭურჭელი, რომელიც ნაბუქოდონოსორმა ოდესღაც წაიღო იერუსალიმიდან და თავისი ღმერთის ტაძარში დააწყო.

⁸ და გამოიტანა ის კიროსმა, სპარსეთის მეფემ, მითრიდატე მოლარეთუხუცესის ხელით, და თვლით ჩააბარა შეშბაცარს, იუდას მთავარს.

⁹ და აი, მათი რაოდენობა: ოქროს ლანგარი – 30, ვერცხლის ლანგარი – 1000, დანა – 29,

¹⁰ ოქროს ბარძიმი – 30, ვერცხლის ორმაგი ბარძიმი – 410 და სხვადასხვა ჭურჭელი – 1000.

¹¹ ოქროს და ვერცხლის ჭურჭელი სულ 5400 იყო. ეს ყოველივე წამოიღო შეშბაცარმა, როცა გადასახლებულები ბაბილონიდან იერუსალიმში დააბრუნეს.