Kawkanta 6 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Panalangin nin ampangawok tambay

(Kanta ni Dabid)

¹ Pangino-on, agmo ko ha-aren nin pahang mo, boy agmo ko parosawan no ampamahang ka.

² Pangino-on, ingalowan mo ko ta makapey ya nawini ko; pakahampaten mo ko ta mabyat ya angkatanam ko.

³ Ombayro simpri ha nakem ko ya masyadon angkagolo. Pangino-on, anggan makano mo ko pa-olayan bayri ha angkatanam ko?

⁴ Pangino-on, alang-alang ha ingangalo moy ma-in panlalabi, pakarani ka kongko ta ilibri mo ko emen agko mati,

⁵ ta no mati ko boy no mipalako ko ha dogal nin nikati, bayro ay ayin mamanemtem komo ni mamori komo.

⁶ Mapagal akoyna ha pan-agol nin banà ha angkatanam ko; kayà yabiyabi, hay pamira-an ko ay angkabahà nin lowà ko.

⁷ Banà ha panangih ko, hay mata ko ay mabereg ana nin bilang ha mata nin tawoy mato-ayna. Habayti ay kagagaw-an nin kawka-away ko.

⁸ Pakarayò kawo kongko, hikawoy ampipanggawà nin kala-etan, ta nilengè nin Pangino-on ya an-itangih kon ida-ing kona.

⁹ Hay da-ing ko kona ay nilengè na, boy ampinto-o ko nin hay pawpanalangin ko ay antobayen na.

¹⁰ Dayi, kaganawan ka-away ko ay mareng-eyan boy mikalito. Antimano dayi, hila ay mipagbiran mog-alih nin banà ha kareng-eyan la.