Kawkanta 3 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Panalangin nin ampahimalà ha Pangino-on

(Habayti ay hinolat ni Dabid hin pinowayowan na hi Absalom ya anak na)

¹ Pangino-on, malakè ya ka-away ko; hay lakè nin angkomontra kongko.

² Malakè ya ampaghalità nin hay Diyos ay ahè manambay kongko.

³ Piro, Pangino-on, hika ay bilang ha halanggà ya ampakapi-atap kongko; komo ampangibat ya karangalan ko. Hika ya ampamakhaw nin nakem ko.

⁴ Hiko ay andoma-ing ha Pangino-on ya anti ha masagradoy bakil, boy tandà koy anleng-en na ko.

⁵ Ha pamimirà ko boy pangangatoloy ay ampaka-imata ko nin ayin dipirinsya ta amprotiksyonan ako nin Pangino-on.

⁶ Maski liboliboy ka-away ko ya anti ha mamalibot ko ay agko angkalimo.

⁷ Pangino-on kon Diyos, tandà ko ya anhira-en moy kapangyariyan nin kaganawan ka-away koy mangala-et emen agla ko mapangno; kayà patoloy mo kon ilibri.

⁸ Hay kalibriyan ay ampangibat ha Pangino-on. Dayi, hay tawtawo mo ay biyan mon kahampatan.