Kawkanta 24 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Hay Arì ya ahè mapantayan

(Kanta ni Dabid)

¹ Hay babon lotà kateng kaganawan anti bayri ay ikon nin Pangino-on; talagan hiya ya ma-in ikon nin babon lotà kateng ampipampa-iri bayri.

² Habayti ya babon lotà ay pinalwa na nin nangibat ha lalè nin lawlanom, ta habayti ay impondasyon na ha lalè nin dawdagat.

³ Hinoy karapatdapat mako ha bakil nin Pangino-on, boy hinoy karapatdapat nin lomo-ob ha masagradoy dogal na?

⁴ Hay karapatdapat bayro ay tawoy mahampat ya gawgawà, malinis ya pagnanakem, ahè anhomamba ha alwan peteg diyos, boy ahè ampangipilit nin hay malì ay tamà.

⁵ Hay tawoy ombayro ay makatanggap nin kahampatan ya mangibat ha Pangino-on, boy halita-en nin Diyos ya Mapangilibri ya habaytoy tawo ay ayin ginawà ya mala-et.

⁶ Hay ombayroy tawtawo ay angkahabek ha Diyos ya pinahimala-an ni Hakob.

⁷ Hay polta nin paghambawan ay pakalo-atan emen hay Arì ya ahè mapantayan ay pomahok.

⁸ Hino bayti ya Arì ya ahè mapantayan? Hiya ay Pangino-on ya makhaw boy makapangyariyan; hiya ay Pangino-on ya makapangyariyan ha labanan.

⁹ Hay polta nin paghambawan ay pakalo-atan emen hay Arì ya ahè mapantayan ay pomahok.

¹⁰ Hino bayti ya Arì ya ahè mapantayan? Hiya ya Pangino-on ya ampama-alà ha kaganawan; hiya ya Arì ya ahè mapantayan.