Kawkanta 146 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Poriyen ya Pangino-on ya mapangilibri

¹ Poriyen moyoy Pangino-on. Poriyen koy Pangino-on.

² Leleg kon angkabiyay ay mamori ko ha Pangino-on. Hiya ya Diyos ko ay kantawan kon pamomori anggan ma-in akon biyay.

³ Agkawo pahimalà ha ampipamo-on, o ha hinoman ya ahè makapilibri komoyo.

⁴ Pangati la, hay nawini la ay morong mag-in lotà; ha allon habayto, hay pawplano la ay ma-anggawan ana.

⁵ Makalmà ya tawoy antambayan nin Diyos ya pinahimala-an nin aw-inalalak ni Hakob; makalmà ya ta an-omasa ya ha Pangino-on ya Diyos na.

⁶ Habayti ya Diyos ya namalsa nin langit, lotà, dagat, boy kaganawan nin anti bayro, boy hiya ya Pangino-on ya tapat ha pawpangakò na.

⁷ Kahampatan ya an-ihosga na ha ampika-apih boy ambiyan nan pamamangan ya ampikabitil. Hay Pangino-on ay ampamalayà nin pawpiriso.

⁸ Hay bawbowag ay ampakahampaten na emen makakit, antambayan nay mangama-in problima, boy anlabiyen nay mangahampat ya tawtawo.

⁹ Amprotiksyonan nay dawdayowan, antambayan nay aw-olila boy bawbawoy babayi, boy anhira-en nay pawplano nin mangala-et.

¹⁰ Hay Pangino-on ay ayin anggay pamomo-on. Hiya ya Diyos ya ampamo-on ha tawtawo na ha dogal ya an-ingaten Siyon boy ha mipanhomono ya lawlahì. Poriyen moyoy Pangino-on.