Kawkanta 145 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Pamomori ha Pangino-on ha kahampatan na

(Kanta ni Dabid)

¹ Ibabalità ko ya karangalan mo, Diyos ko ya Arì; hay ngalan mo ay poriyen ko nin ayin angga.

² Allo-allo katan poriyen, boy ayin anggay pamomori ko ha ngalan mo.

³ Marangal ya Pangino-on boy hiya ay nararapat poriyen; hay karangalan na ay ahè makwan ihipen.

⁴ Hika ay poriyen nin nika-onay lahì ha homonoy lahì nin banà ha gawgawà mo; ibabalità lay gawgawà moy makapangyariyan.

⁵ Hole-le-en koy karangalan mo boy kagandawan nin kahawangan mo kateng kawkapapa-ispantay gawgawà mo.

⁶ Hay tawtawo ay mangibabalità nin tongkol ha kapangyariyan nin kawkapapa-ispantay gawgawà mo; hiko itaman ay mangibabalità ha kaganawan tawo nin tongkol ha karangalan mo.

⁷ Hila ay mangibabalità boy magkanta nin tongkol ha masyadoy kaba-itan mo boy kahampatan mo.

⁸ Hay Pangino-on ay malabi boy ma-ingangalowen; hiya ay alwan mapapahangen boy ponò yan ingangaloy ma-in panlalabi.

⁹ Mahampat ya Pangino-on ha kaganawan, boy an-ingalowan nay kaganawan pinalsa na.

¹⁰ Kaganawan pinalsa mo, Pangino-on ay mamori komo; kateng nag-in tawtawo mo ay mamori simpri komo.

¹¹ Hay nag-in tawtawo mo ay maghalità nin tongkol ha kagandawan nin pamomo-on mo boy tongkol ha kapangyariyan mo

¹² emen kaganawan tawo ay makatandà nin tongkol ha gawgawà moy makapangyariyan, boy tongkol ha pamomo-on mo ya ma-in kagandawan boy kahawangan.

¹³ Hay pamomo-on mo ay ayin angga boy hika ay mag-arì anggan makakanoman. Hay Pangino-on ay tapat ha kaganawan pangakò na boy malabi ya ha kaganawan pinalsa na.

¹⁴ Kaganawan nin ma-in kakapeyan ay ampakhawen na boy kaganawan nin ma-in problima ay antambayan na.

¹⁵ Kona an-omasa ya kaganawan pinalsa na, boy hiya ya ampambi nin pamamangan la ha oras nin panganga-ilangan la.

¹⁶ Hila ay ambiyan na nin tamà ha panganga-ilangan la; kayà angkapasasà hila.

¹⁷ Hay Pangino-on ay mahampat boy ma-ingangalowen ha kaganawan pinalsa na.

¹⁸ Hiya ay marani ha kaganawan ampangingat kona nin leseb ha nakem.

¹⁹ An-igwà nay pawpanganga-ilangan nin ampipanggomalang kona; anleng-en nay dawda-ing la boy an-ilibri na hila.

²⁰ An-i-atap nay kaganawan ampanlabi kona, piro hay mangala-et ay an-apo-en na.

²¹ Hiko ay mamori ha Pangino-on. Kaganawan pinalsa na, anggan makakanoman ay mamori dayi ha ngalan nay ayin kapintasan.