Kawkanta 130 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Panalangin emen tambayan

(Kanta ya angkantawen mintras ampako ha bali nin Diyos)

¹ Pangino-on, ha masyadoy kalele-an ya andanasen ko nin banà ha kadya-dya-an ay andoma-ing ako komo.

² Kayà, Pangino-on, leng-en moy an-ida-ing ko komoy tambay.

³ Pangino-on, no agmo liwawan ya kawkasalanan nawen ta pirmi mon etpanan, ma-in warì konnawen nin makapaki-arap komo?

⁴ Piro ampatawaren mo kayi; kayà anggomalang kayi komo.

⁵ Angkahabek ako ha pangantì ko komo, Pangino-on, ta an-omasa ko ha pangakò mo.

⁶ Ha pangantì ko ha Pangino-on ay mas et ha bantay ya panyabi ya ampangantì nin homilà ya allo; talagan mas et ha bantay ya panyabi ya ampangantì nin homilà ya allo.

⁷ Hikawoy aw-inalalak ni Israyil, omasa kawo ha Pangino-on ta hiya ay ma-in ingangaloy ma-in panlalabi; boy hiya ay pirmin handà nin mangilibri.

⁸ Hiyan mismo ya mangilibri nin aw-inalalak ni Israyil ha kaganawan kasalanan la.