Kawkanta 122 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Panalangin emen magkama-in katinekan ya siyodad nin Hirosalim

(Kanta ni Dabid ya angkantawen mintras ampako ha bali nin Diyos)

¹ Hay towà ko hin ma-in naghalità kongko nin ombayri: “Mako tamo ha bali nin Pangino-on.”

² Hapa-eg ay anti kayi bayri nin ampireng ha polta nin siyodad nin Hirosalim.

³ Hay Hirosalim ay ginawà nin ma-ayos ya siyodad, ta hay bawbali bayri kateng aw-alal ya padir ay in-ayos nin pinikakabit.

⁴ Bayri anlomakat ya lawlipì ni Israyil nin mamori ha Pangino-on kompormi ha impanogò na konla.

⁵ Anti simpri bayri ya panosgawan nin aw-arì ha tawtawoy angkasakopan la. Habayti ya aw-arì ay ibat ha pamilya ni Dabid.

⁶ Emen magkama-in katinekan ya siyodad nin Hirosalim ay manalangin kawo nin ombayri: “Dayi, hay ampipanlabi ha siyodad ya habayti ay magkama-in ka-inomayan.

⁷ Dayi ay magkama-in katinekan ha lo-ob nin habayti ya siyodad, boy dayi, hay ampa-iriyan nin ampipamo-on ay mag-in matinek.”

⁸ Alang-alang ha pawpatel ko boy ha aw-amigo, hay halita-en ko ha siyodad nin Hirosalim ay ombayri: “Magkama-in katinekan.”

⁹ Alang-alang simpri ha bali nin Pangino-on tamon Diyos ay an-ipanalangin koy ka-inomayan nin habayti.