Kawkanta 110 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Tongkol ha Pangino-on Diyos boy ha Arì ya pinilì na

(Kanta ni Dabid)

¹ Hinalità nin Pangino-on Diyos ha Pangino-on ko ya ombayri: “Miknò ka ha bandan wanan ko anggan hay kawka-away mo ay talowen ko boy igwà ko hila ha hilong nin kapangyariyan mo.”

² Hay Pangino-on ay mambi komon kapangyariyan mamo-on ya mangibat ha dogal ya an-ingaten Siyon. Hika ay mamo-on ha kawka-away mo.

³ Ha allo nin labanan moy kawka-away mo, hay tawtawowan moy lawlalaki ay mipagbolontad nin makilamo komo. Hila ay ayin imbalag ha deyang no mahambak nin banà ha kalago-an la, boy hila ay makilamo komo nin mako ha masagradoy bawbakil.

⁴ Hay Pangino-on ay naghompà nin nagpangakò nin ombayri: “Hika ay parì anggan makakanoman nin bilang koni Milkisidik ya parì hin hato.”

⁵ Hay Pangino-on ay anti ha bandan wanan mo; hay aw-arì ay talowen na ha allo nin hiya ay mamahang.

⁶ Hosgawan nay nawnasyon boy hay dawdogal ya ampilalabanan ay datakan nan bawbangkay, ta pahoko-en nay ampipamo-on ha intiron babon lotà.

⁷ Hiya ay minom ha hapà ya anti ha pingit daan; banà bayro, hiya ay homkaw boy talowen nay kawka-away na.