Kawkahalita-an 8 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Hay tongkol ha karonongan

¹ Leng-en moyo! Agmoyo nayì angkalengè ya tongkol ha karonongan ya ampangibat ha Diyos ya kowinta ampangingat komoyo, boy tongkol ha pangingintindi ya kowinta ampambolyaw komoyo?

² Hay karonongan ay kowinta ampireng ha matag-ay ya dogal ha danin daan, ha kawkanton daan,

³ boy ha pawpolta nin palako ha siyodad ya ampangibolyaw nin ombayri:

⁴ “Hikawoy tawtawo ha babon lotà, balang miha komoyo ay an-ingaten ko.

⁵ Hikawoy alwa et nin matodtod, magpakatodtod kawo. Hikawoy tawtangah, magnakem kawo.

⁶ Leng-en moyoy hawhalità koy mangahampat; kaganawan halita-en ko komoyo ay tamà.

⁷ Hay anhalita-en ko ay kaptegan; hay kabongkokan ay angka-inakitan ko.

⁸ Kaganawan anhalita-en ko ay kaptegan; agko ampaghalità nin kalawakaw o kabongkokan.

⁹ Ha tawoy ma-in pangingintindi, habaytoy hinalità ko ay malinaw para kona, boy matoynong para ha ma-in tinandà.

¹⁰ Tanggapen moy tawtorò ko boy tinandà kisa magsikap kan manikap nin pilak boy taganas gintò.

¹¹ “Hiko ya karonongan ay mas mahampat kisa ha aw-alahas, boy ha kaganawan angka-ibegan mo ay ayin ma-ipariho ha karonongan ya ayin kanayon no alwan hiko.

¹² Hiko ya karonongan ay ampambin pangingintindi, boy ma-in akon tinandà nin mangintindi.

¹³ Hay anggomalang ha Pangino-on ay angka-inakit ha kala-etan. Hiko man ay angka-inakit ha mapagmatag-ay, mahambog, mala-et ya gawgawà, boy ha kawkabongkokan.

¹⁴ Hiko ya karonongan ay makapagwawali nin mahampat ta ma-in akon pangingintindi boy kakhawan.

¹⁵ Banà kongko, hay aw-arì ay angkagawà lay pamomo-on la, boy hay ampipamo-on ay ampakagawà nin tamà ya pawpanogò.

¹⁶ Ha tambay ko, hay ampipamo-on ha babon lotà ay matoynong ya pamomo-on.

¹⁷ Anlabiyen koy ampipanlabi kongko, boy matotowan ako nin ampipagsikap manoto kongko.

¹⁸ Hay kayamanan, karangalan, boy ka-inomayan ay hikoy makab-i.

¹⁹ Hay makwa moyo kongko ay igit et ha pinakama-alagà ya poroy gintò boy poroy pilak.

²⁰ Hay mananggap kongko ay ampamiyay nin ma-in kahampatan, boy anhomonol ha katoynongan.

²¹ Hay ampipanlabi kongko ay ambiyan kon kayamanan, boy hay bali la ay ampon-en kon kawkamama-in ya manga-alagà.

²² “Biha pinalsa nin Diyos ya kaganawan, hiko ya karonongan ay antina kona.

²³ Hin ka-ona-onawan pana-on, ayin et ya babon lotà, hiko ay hikoyna.

²⁴ Hiko ay hikoyna hin ayin et dagat boy ayin et hawhobol ya anlowahan lanom.

²⁵ Biha na-ikolokar ya bawbakil boy bawbakilbakil, hiko ay hikoyna.

²⁶ Hiko simpri ay hikoyna biha ginawà nin Diyos ya babon lotà, lawlawak, o maski anyay klasin lotà.

²⁷ Anti ko kona hin ginawà nin Diyos ya langit boy pi-anggawan nin langit boy lotà,

²⁸ hin inggawà nin Diyos ya leem ha langit kateng hawhobol ha dagat,

²⁹ hin minandawan nay dagat nin ahè lomampas ha inggawà nay pi-anggawan, boy hin inggawà nay pampatibay nin lotà.

³⁰ Hiko ay anti ha dani nin Diyos nin bilang mihay arkitikto. Allo-allo, hiko ya ampangibatan nin kaligawan na, boy hay towà ko ta anti ko kona.

³¹ An-ikaliga koy babon lotà ya ampa-iriyan nin tawtawo, boy angkatowà ako konla.

³² “Hapa-eg, aw-anak koy lalaki, leng-en moyo ko. Makalmà ya tawtawoy anhomonol kongko.

³³ Leng-en moyo boy pa-alaga-an ya an-itorò komoyo. Magpakatalino kawo.

³⁴ Makalmà ya tawoy ampanlengè kongko boy allo-allon anti ha poltan bali ko nin ampangantì kongko.

³⁵ Hinoman ya tawoy makatoto kongko ay magkama-in biyay ya ayin anggawan boy mangonsowilo kona ya Pangino-on.

³⁶ Balè hinoman ya tawoy ahè makatoto kongko ay ampakakhitan nay sarili na. Hinoman ya ampag-inakit kongko ay kamatyan ya antikapen na.”