Yob 1 - Sranan Tongo Bible 2016

Yob nanga en famiri

¹ Fos'fosi wan man ben e libi ini a kondre Us di ben nen Yob. Sma no ben man sori finga tapu Yob, a ben de fu fertrow, a ben e lespeki Gado èn a no ben wani abi not'noti fu du nanga ogridu.

² Yob ben abi seibi manpikin nanga dri umapikin.

³ Moro fara a ben abi seibi dusun skapu nanga krabita, dri dusun kameel, wan dusun kaw di ben wroko tu na tu, nanga feifi hondro umaburiki. A ben abi bun furu umasrafu nanga mansrafu tu. Yob ben de a moro guduman fu a sei pe a son e opo.

⁴ Den manpikin fu en ben abi a gwenti fu hori fesa èn den ben e kari den dri s'sa fu den kon fu nyan èn dringi makandra nanga den. Wan fru wan den brada ben e du a sani dati na den eigi oso.

⁵ Ma baka te iniwan fu den brada ben hori so wan fesa, Yob ben kari ala den pikin fu en kon na en, fu ben krin den. Dan Yob ben e opo fruku mamanten fu bron wan meti leki ofrandi gi Gado gi iniwan fu den. Bika a ben e prakseri na ini ensrefi taki: “Kande den pikin fu mi sondu èn afrontu Gado ini den prakseri.” Ala leisi baka Yob ben e du a sani dati.

⁶ Wan dei den engel go fesi MASRA èn satan, a wan di e kragi libisma, ben go tu.

⁷ Ne MASRA aksi satan taki: “San yu ben e du so den ten disi?” Satan piki MASRA taki: “Mi ben go teki wan koiri na grontapu èn mi wakawaka na alasei fu en.”

⁸ Dan MASRA taigi satan taki: “Dan yu mus fu si fa Mi knekti Yob e tyari ensrefi. Bika no wan tra sma na grontapu de leki en. Sma no man sori finga na en tapu, a de fu fertrow, a e lespeki Mi èn a no wani abi not'noti fu du nanga ogridu.”

⁹ Satan piki MASRA taki: “Ma a no fu soso meki a e lespeki Yu.

¹⁰ Bika Yu e kibri en, Yu e kibri a uma nanga den pikin fu en, sosrefi ala san a abi. Yu e blesi a wroko di a e du owktu, dat' meki den meti fu en furu sote tak' den kan furu a heri kondre.

¹¹ Ma efu Yu sa teki ala san a abi, Yu o si tak' a o fluku Yu na ala sma fesi.”

¹² Dan MASRA taigi satan taki: “A bun, Mi e gi yu a makti fu yu teki ala san a abi, ma ensrefi yu no mus fasi.” Dan satan kmopo na fesi MASRA.

¹³ Wan dei di den manpikin nanga den umapikin fu Yob ben de na a oso fu a moro bigi brada fu den, e nyan èn dringi win,

¹⁴ wan fu den knekti fu Yob lon go na Yob go taigi en taki: “Un ben e wroko nanga den kaw fu drai a doti èn den buriki ben e nyan grasi krosbei fu unu,

¹⁵ di wantronso wan grupu Sabeasma broko kon na un tapu. Den kiri den tra knekti nanga deigri èn den fufuru den meti. Mi wawan ben kan lowe fu kon taigi yu san psa.”

¹⁶ A knekti no ben kba taki ete, di wan trawan lon kon. A dati taki: “Faya di e koti na heimel kisi den skapu, den krabita nanga den knekti di ben e luku den. A bron den èn den alamala dede. Mi wawan ben kan lowe fu kon taigi yu san psa.”

¹⁷ A knekti dati ben e taki ete, di wan trawan lon kon. A dati taki: “Den Kaldeasma broko kon fu dri sei na un tapu. Den kiri den tra knekti nanga deigri, èn den fufuru ala den kameel tyari gwe. Mi wawan ben kan lowe fu kon taigi yu san psa.”

¹⁸ A di fu dri knekti ben e taki ete, di ete wan trawan lon kon. A dati taki: “Den manpikin nanga den umapikin fu yu ben e nyan èn den ben e dringi win ini a oso fu den brada, a fosi manpikin fu yu,

¹⁹ di wantronso wan hebi winti kmoto fu a bigi dreisabana go tuka nanga a oso fu en. Ala den fo skotu broko fadon tapu den pikin fu yu. Den alamala dede. Mi wawan ben kan lowe fu kon taigi yu san psa.”

²⁰ Ne Yob opo, a priti a langa dyakti fu en, èn a piri en ede leki marki taki a ben e sari. Baka dati a fadon go tapu en kindi èn a boigi en ede go te na gron,

²¹ dan a taki: “Nanga leigi anu mi kon na grontapu, nanga leigi anu mi sa drai gwe baka. Na MASRA ben gi mi ala san mi ben abi, na MASRA teki ala sani baka. Prijse a nen fu MASRA!”

²² Ala den sani dati di miti Yob, no meki Yob sondu fu sori finga tapu Gado.