Psalm 1 - Sranan Tongo Bible 2016

Den tu pasi

¹ A sma di no e teki rai fu ogri-ati sma na wan blesi sma. So wan sma no e du den srefi sani di sondusma e du, a no e sidon tu nanga sma di lobi fu e meki spotu.

² Ma a lobi a wèt fu MASRA. A e leisi en, a e prakseri en go, a e prakseri en kon, dei nanga neti.

³ So wan sma de leki wan bon di prani sei wan kriki, di e gi froktu tapu a yoisti ten, en wiwiri no e flaw. Ala sani di a e du e waka bun.

⁴ Ma sani no e waka so gi ogri-ati sma. den de leki karuwiwiri di a winti e wai gwe.

⁵ Dat' meki ogri-ati sma o kisi den strafu nomonomo, sondu sma no o man de makandra nanga sma di bun ini Gado ai.

⁶ Bika MASRA e tyari èn kibri den sma di bun ini En ai, ma ogri-ati sma e lasi gwe.