Obadya 1 - Sranan Tongo Bible 2016

Den sani di o miti Edom

¹ Den sani di Gado meki Obadya si. Na disi MASRA taki tak' o psa nanga Edom. Wi kisi a boskopu fu MASRA èn a seni wan boskopuman go na ala folku fu taki: “Kon meki wi hari go feti nanga den.”

² Arki, Mi meki un kon swaki, ala sma o si unu fu noti.

³ Yu ben denki tumsi bigi fu yusrefi èn na dati kori yu. Fu di yu e libi hei ini den bergi-olo, ini yu oso di de bun hei, meki yu e taki: Suma o man saka mi kon na gron?

⁴ Awinsi yu ben meki yu nesi so hei leki den tingifowru, awinsi yu ben meki en mindri den stari srefi, fu te drape Mi o hari yu kon na gron, na so MASRA taki.

⁵ Te fufuruman e kon, te abani broko kon ini yu oso te neti den e teki soso san den wani. Ma fu yu den o fufuru ala sani tyari gwe. Srefi den sma di e piki lepi droifi e libi wantu droifi na den bon.

⁶ Ma gi yu den no o libi not'noti na baka, srefi den gudu di yu ben kibri den o feni tyari gwe.

⁷ Den sma nanga san yu ben e wroko makandra o yagi yu puru ini yu eigi kondre. Den o bedrigi yu, yu eigi mati o broko yu makti. Sma nanga san yu ben e nyan makandra o kori yu. Pe a koni fu yu go?

⁸ Na so MASRA taki: A dei e kon taki Mi o kiri ala koniman na ini Edom. No wan sma nanga ferstan o de moro tapu den bergi fu Esau.

⁹ Den dyadya fetiman fu Teman o skreki taki den no o sabi san fu du. Ala sma di e tan tapu den bergi fu Esau sa dede.

¹⁰ Yu sa kisi syen èn den o figi yu puru na pasi fu a ogri di yu du nanga yu brada Yakob.

¹¹ Bika a ten di den feyanti broko go ini Yerusalem, di doroseisma ben e srepi den srudati fu en tyari gwe èn di den ben e fringi lot fu prati a gudu fu den, a ten dati yu ben tnapu e luku èn yu ben e meki leki wan fu den.

¹² Yu no ben mus firi switi a dei di yu brada ben de ini nowtu. Yu no ben mus prisiri di den ben e kiri den sma fu Yuda. Yu no ben mus taki bigitaki di den ben de ini bigi benawtu.

¹³ Yu no ben mus kon ini a foto fu Mi folku. Yu no ben mus prisiri di den ben de ini problema, di a ongoloku ben e miti en. Yu no ben mus langa yu anu teki den gudu fu en di a ongoloku ben e miti en.

¹⁴ Yu no ben mus tnapu wakti tu tapu den sma di ben e lowe fu kiri den. Yu no ben mus grabu den sma tu di ben lon di den ben de ini a benawtu, fu gi den abra na den feyanti fu den.

¹⁵ A dei fu MASRA de fu kon gi ala folku. Den o du den srefi sani nanga yu leki fa yu ben du. Den sani san yu du o fadon tapu yu eigi ede baka.

¹⁶ Mi pipel, leki fa unu ben tesi Mi atibron tapu Mi santa bergi, na so ala folku sa tesi en tu. Den o dringi fu en te den no man moro èn a o de leki noiti den no ben de na grontapu.

¹⁷ Ma un sa feni kibripe tapu a bergi Sion. A sa de wan santa presi. Den bakapikin fu Yakob sa kisi baka san ben de fu den.

¹⁸ Den bakapikin fu Yakob sa de leki wan faya, den di fu Yosef sa de leki wan fayatongo, di fu Esau sa de a drei grasi. Den o bron en. A faya o nyan en, èn no wan bakapikin fu Esau sa tan na libi. Na MASRA taki tak' dati o psa.

¹⁹ Den sma di e libi na a zuidsei sa teki a bergi pe Esau e tan abra, den wan di e tan ini a kontren na den bergifutu sa teki a kondre fu den Filistijnsma abra. Den o teki a kontren tu fu Efraim nanga di fu Samaria abra, èn Benyamin sa teki Gilead abra.

²⁰ Den sma fu Israel di den ben tyari gwe nanga tranga, sa tron wan legre di o teki a kondre fu den Kananitisma abra te go miti Sarefat. Den di fu Yerusalem di den ben tyari gwe nanga tranga, den di e libi na ini Sarefat, sa teki ala den foto na zuidsei abra.

²¹ Sma o kren a Sionbergi fu tyari ferlusu, fu tiri den bergi fu Esau èn MASRA sa de kownu.