Nahum 1 - Sranan Tongo Bible 2016

¹ A boskopu fu Gado gi Nineve. Disi na a buku pe den sani skrifi di Nahum, fu Elkos, si.

² MASRA na wan dyarusu Gado, wan Gado di e pai den feyanti fu En baka. Nanga bigi atibron MASRA e pai den baka. MASRA e pai den sma baka di wan feti nanga En, A e puru En atibron tapu den feyanti fu En.

³ MASRA abi langa pasensi, ma A abi bigi krakti tu. MASRA e strafu ala sma di fiti fu kisi strafu. A e kon ini wan drai winti, ini wan tranga winti. Den wolku ondro En futu, den de leki drei doti di e wai opo.

⁴ A e komanderi a se, A e meki a se drei gwe. Ala liba A e meki drei gwe. So den wei fu Basan e drei gwe. Ala san e gro tapu a Karmelbergi e drei gwe tu. srefi den bromki fu a Libanonbergi e drei gwe.

⁵ Bergi e beifi gi En, pikin bergi e seki. Grontapu e opo gi En, iya, ala den kondre nanga ala den sma fu den.

⁶ Suma man kaka futu gi a atibron fu En? Suma man tan tnapu efu A lusu En atibron? A atibron fu En de leki wan faya, wan faya di e broko bigi ston pis'pisi.

⁷ Ma MASRA bun, A de leki wan tranga presi pe yu kan go kibri te yu de ini nowtu. A sabi den sma di e kibri na En.

⁸ Nanga wan frudu A e wasi a presi fu En feyanti gwe. A e yagi den go na dungru presi.

⁹ Awinsi san den prakseri fu du baka, MASRA e pori den prakseri fu den.

¹⁰ Bika awinsi den frekti densrefi leki makamaka kon na wan, awinsi sopi e meki den firi taki den man du ala sani, leki drei grasi den o bron gwe.

¹¹ Na ini yu wan sma kmoto di ben poti na en ede fu du ogri, di ben sidon prakseri fu du MASRA wan sani di no bun.

¹² Ne MASRA taki disi: “Awinsi den kon nanga ala krakti, awinsi den kon bosubosu, den o wai kmoto na pasi, den o dede gwe. Mi ben broko yu saka, ma mi no sa broko yu saka moro.

¹³ Mi o puru den na yu tapu bika den ben de leki wan ston na yu neki. Mi o broko den keti di ben tai yu.”

¹⁴ Ma gi yu, MASRA taki disi: Yu no sa kisi pikin moro fu tyari yu nen. Mi o broko ala den popki fu den gado fu yu ini den tempel fu den. Mi o meki yu grebi klari, bika yu no warti fu tan na libi.

¹⁵ Luku, wan knekti e lon kon abra den bergi, wan di e tyari bun nyunsu fu ferlusu kon. Yuda, hori den fesa fu yu, du den sani di yu ben pramisi fu du. Bika a ogriwan no o hari kon ini yu kondre moro, A kiri puru na pasi.