Mika 1 - Sranan Tongo Bible 2016

¹ Disi na a boskopu di MASRA gi Mika fu a foto Moreset. Mika kisi a boskopu disi leki wan sani di Gado ben meki a si fu Samaria nanga Yerusalem. A ben si den sani disi ini a ten di Yotam, Akas nanga Yekiskia ben de kownu fu Yuda.

Gado e taigi Mika san o psa nanga Samaria nanga Yerusalem

² Ala folku, un poti un yesi arki, grontapu nanga ala sani di de na en tapu mus yere disi! MASRA fu Masra sa krutu unu, Masra sa krutu unu ini En santa tempel.

³ Luku, MASRA kmoto fu a presi pe A e tan, A e saka kon, A e waka abra den moro hei presi fu grontapu.

⁴ Bergi e kon safu na ondro En futu, den dal e priti opo, leki fa kandrafatu e kon safu te a e faya, leki fa watra e lon saka fu wan bergi.

⁵ Na fu den takrudu fu Yakob meki disi psa, na fu den sondu fu a pipel fu Israel ede. Sortu takrudu Yakob du so? Luku Samaria dan yu o sabi. Suma e dini kruktu gado tapu den hei presi ini Yuda? Na Yerusalem e du dati.

⁶ Na fu dat'ede Mi o broko Samaria. A o de leki wan broko pranasi ini wan opo wei. Droifidyari wawan den kan meki drape ete. Mi o fringi den ston fu a foto go ini wan dal, Mi o meki a fundamenti fu en de fu si.

⁷ Mi o naki ala den ston nanga udu popki fu den kruktu gado broko. Mi o bron ala den kado di den tyari gi den huru di e wroko na a tempel. Mi o broko ala den kruktu gado fu den pis'pisi, bika den ben bai den nanga moni di den ben kisi leki kado fu den huru èn na dati den o tron baka.

⁸ Na fu dati mi e sari, na fu dati mi e krei, na fu dati meki mi e waka nanga sosofutu èn sondro krosi. Na fu dati meki mi e bari leki wan krabudagu, dyeme leki wan owrukuku.

⁹ Bika den soro fu Samaria no o kon betre, a srefi sani o miti Yuda. a o doro te na a mofodoro fu mi pipel, a o doro te na Yerusalem.

¹⁰ No meki Gat kon sabi san psa, un no mus krei drape. Lolo na gron na ini Afra.

¹¹ Un hari psa, un sma fu Safir un hari psa, sondro krosi èn nanga bigi syen. Den sma fu Saanan no man sori den fesi Un no man tan na ini Bet-Haesel, fu a krei di den sma e krei drape.

¹² Den sma fu Marot e frede taki sani no o go den bun. Bika MASRA seni wan bigi ogri kon, a de leti na mofodoro fu Yerusalem.

¹³ Sma fu Lakis, Un tai den asi fesi den wagi. Na drape a sondu fu Sion bigin, den srefi sondu fu Israel de fu feni ini yu.

¹⁴ Gi Moreset-Gat wan kado te a e gwe. Den kownu fu Israel no o man bow moro tapu yepi fu Aksib.

¹⁵ Sma fu Maresa, wantron moro Mi o seni wan feyanti kon di o teki a heri foto abra. Den fesiman fu Israel sa lowe go na Adulam.

¹⁶ Koti ala yu wiwiri puru, piri yu ede, fu den pikin di yu ben lobi so. Piri yu ede leki di fu wan tingifowru, fu di den tyari den gwe nanga tranga go na wan tra kondre.