Lukas 1 - Sranan Tongo Bible 2016

¹ Masra Teofilus, Furu sma meki muiti kba fu skrifi den sani san ben psa na un mindri,

² soleki fa den sma di ben si ala den sani sensi na a bigin èn di ben panya a boskopu, ben ferteri wi.

³ Ma baka di misrefi go ondrosuku fin'fini fa ala sani ben waka sensi na a bigin, mi prakseri taki a ben o bun fu skrifi den sani soleki fa den ben psa, poti ini wan buku gi yu.

⁴ Mi e du disi fu yu kon si taki den sani san den ben leri yu, na tru.

Wan engel go na Sakarias

⁵ Ini den dei di Herodes ben de kownu fu Yudea, wan priester ben de di ben nen Sakarias. A ben de fu a grupu fu Abia. En uma Elisabet ben de wan bakapikin fu Aaron.

⁶ Den tu sma disi ben bun ini Gado ai, èn den ben hori densrefi na ala den komanderi fu Gado èn na san A ben wani taki sma mus du. No wan sma ben man taki takru fu den.

⁷ Ma den no ben abi no wan pikin, bika Elisabet no ben man kisi pikin, èn den ala tu ben kon owru kba.

⁸ Now a ben de a ten taki Sakarias ben mus du en wroko leki priester gi Gado, fu di a grupu fu en ben mus du a wroko a pisten dati.

⁹ Dan soleki fa a gwenti fu den priester ben de, den ben hari lot fu luku suma ben mus go na ini a santa presi fu Masra fu go bron switismeri. Di den hari a lot, a sori taki na Sakarias ben mus go.

¹⁰ A yuru di a switismeri ben e bron, ala den sma ben de na prasi e begi.

¹¹ Dan wan engel fu Masra sori ensrefi na Sakarias. A engel ben tnapu na a let'sei fu a altari pe a switismeri ben e bron.

¹² Di Sakarias si a engel, a skreki èn a kon frede.

¹³ Ma a engel taigi en taki: “Sakarias, no frede. Gado yere yu begi. Elisabet, a uma fu yu, o kisi wan manpikin gi yu èn yu mus kari en Yohanes.

¹⁴ Yu o breiti èn prisiri nanga en, èn furu sma o prisiri taki a kon gebore.

¹⁵ Bika a o de wan prenspari man fu Masra. A no mus dringi win noso sopi. Na ini en m'mabere srefi a o furu nanga a Santa Yeye.

¹⁶ A o meki furu sma fu Israel drai kon baka na Masra, a Gado fu den.

¹⁷ A o waka na Masra fesi tapu a srefi fasi èn nanga a srefi krakti fu Elia. A o meki taki pratifasi no de moro na mindri pikin nanga den bigisma fu den. A o meki sma di trangayesi, bigin libi leki den sma di bun ini Gado ai. Na so a o meki a folku klari gi Masra.”

¹⁸ Dan Sakarias aksi a engel taki: “Fa mi o sabi taki a sani disi o psa? Bika mi owru kba, èn a uma fu mi doro wan hei libi marki kba tu.”

¹⁹ Dan a engel piki en taki: “Mi na Gabriyel, a wan di e tnapu krosbei fu Gado. Na En seni mi kon na yu fu ferteri yu a bun nyunsu disi.

²⁰ We luku, den sani san mi taigi yu, o psa na a ten di Gado poti. Ma fu di yu no bribi san mi taigi yu, yu o babaw. Yu no o man taki te leki a dei te ala den sani disi o psa.”

²¹ A pisten dati den sma ben de na prasi e wakti Sakarias. Den ben ferwondru taki Sakarias tan so langa ini a santa presi.

²² Di Sakarias kon na dorosei, a no ben man taki nanga den. So den sma kon ferstan taki Gado ben sori en wan sani ini a santa presi. A meki wantu beweigi nanga en anu èn a tan babaw.

²³ Di a ten kon kba san a ben mus du en wroko, a drai go baka na en oso.

²⁴ Baka den dei dati en uma Elisabet hori bere. Feifi mun langa a no ben kmopo na ini en oso fu sma si en.

²⁵ Elisabet taki: “Disi na san Gado du gi mi ini a ten di A sari mi. A puru a syen na mi tapu san mi ben abi mindri den sma.”

Wan engel go na Maria

²⁶ Di Elisabet ben abi siksi mun bere, Gado seni a engel Gabriyel go na a foto Nasaret ini Galilea.

²⁷ A ben mus go na wan yongu uma di noiti no ben sribi nanga wan man ete. A yongu uma disi ben nen Maria. A ben o trow nanga Yosef, wan man di ben de wan bakapikin fu kownu David.

²⁸ Di Gabriyel go ini a oso fu Maria, a taki en odi. Dan a taigi en taki: “Masra de nanga yu, èn a blesi fu Masra de na yu tapu.”

²⁹ Maria skreki sote di a yere san a engel taki. Dan a aksi ensrefi san a odi disi wani taki.

³⁰ Ma a engel taigi en taki: “Yu no abi fu frede, Maria, bika Gado sori yu a bun-ati fu En.

³¹ Luku. Yu o hori bere, èn yu o kisi wan manpikin. Yu mus kari en Yesus.

³² A o de wan prenspari man èn den o kari En a Manpikin fu a Moro Hei Gado. Masra Gado o meki A tron kownu na a presi fu En afo David.

³³ A sa de a kownu fu a folku Israel fu têgo, èn noiti wan kba o kon na a tiri fu En.”

³⁴ Dan Maria taigi a engel taki: “Fa dati o du psa? Bika noiti ete mi sribi nanga wan man.”

³⁵ Dan a engel piki en taki: “A Santa Yeye o kon na yu tapu, èn a krakti fu a Moro Hei Gado o saka kon tapu yu. Dat' meki den sa kari a santa pikin di o gebore, a Manpikin fu Gado.

³⁶ Luku, Elisabet a famiri fu yu, owru kba. Ma ensrefi de nanga bere fu kisi wan manpikin. Den ben taki a no man kisi pikin, ma na siksi mun kba di a abi bere.

³⁷ Bika noti no de san Gado no kan du.”

³⁸ Dan Maria taki: “We, mi de na Masra anu. Meki ala sani psa nanga mi soleki fa yu taki.” Dan a engel gwe.

Maria go luku Elisabet

³⁹ Baka dati Maria teki pasi go es'esi na wan foto san de ini den bergi fu Yudea.

⁴⁰ A go na Sakarias oso, dan a gi Elisabet odi.

⁴¹ Di Elisabet yere a odi fu Maria, a pikin dyompo ini en bere. Ne Elisabet kon furu nanga a Santa Yeye,

⁴² dan a taki nanga tranga sten taki: “Masra blesi yu moro ala uma di de, èn a blesi fu Masra de tapu a pikin ini yu bere.

⁴³ Ma fa mi du feni a bun disi, taki a m'ma fu a Mesias kon luku mi?

⁴⁴ Bika luku, di mi yere a odi fu yu, a pikin dyompo fu prisiri ini mi bere.

⁴⁵ A blesi fu Gado de na yu tapu fu di yu bribi taki a sani san Masra taigi yu, o psa.”

A singi fu Maria

⁴⁶ Dan Maria taki: Nanga mi heri ati mi e opo a nen fu Masra,

⁴⁷ èn nanga ala sani san de na ini mi, mi e prisiri nanga Gado, mi Ferlusuman.

⁴⁸ Bika A prakseri mi, aladi mi na a moro lagi knekti fu En. Luku, bigin fu now ala sma o taki, yari go yari kon, taki mi na wan blesi sma.

⁴⁹ Bika Gado di abi Makti, A du bigi sani gi mi èn a nen fu En santa.

⁵⁰ A e sori sari-ati na ala sma di e lespeki En, den sma di e libi nownow, nanga den di o libi bakaten.

⁵¹ A du bigi wroko nanga a makti fu En. A tyari bruya kon ini den prakseri fu den sma di abi bigimemre.

⁵² A meki den bigiman fu kondre lasi den makti, èn A opo den sma di trawan no e teri.

⁵³ Den sma nanga angribere A gi nofo fu nyan, ma den guduman A seni gwe nanga soso anu.

^54-55 Soleki fa A pramisi den bigisma fu unu, A langa wan anu gi Israel, a folku di e dini En. Bika A memre taki fu têgo A ben o sori sari-ati na Abraham, nanga na den bakapikin fu en.

⁵⁶ Maria ben tan dri mun so na Elisabet, dan a drai go baka na en oso.

Yohanes kon gebore

⁵⁷ Di a yuru doro fu Elisabet meki a pikin, a kisi wan boi.

⁵⁸ Den birtisma nanga den famiri fu en, ben yere fa Masra ben sori bigi sari-ati na Elisabet. So den ben prisiri nanga en.

⁵⁹ Di a boi tapu aiti dei, den sma kon fu besnei a boi. Dan den ben wani gi a boi a nen fu en p'pa Sakarias.

⁶⁰ Ma en m'ma taki: “Nono. Un mus kari en Yohanes.”

⁶¹ Ma den taigi Elisabet taki: “No wan sma de ini yu famiri di abi a nen dati.”

⁶² Dan den sma meki wantu beweigi nanga den anu fu aksi Sakarias fa a wani taki a pikin mus nen.

⁶³ Ne Sakarias aksi den sma wan sani fu skrifi na tapu. A skrifi taki: “A mus nen Yohanes.” Ala den sma ben ferwondru.

⁶⁴ Dan wantron so Sakarias ben man taki baka èn a bigin fu opo Gado nen.

⁶⁵ Ala den sma di ben libi ini a birti fu den, ben kisi bigi lespeki gi Gado. Èn ini a heri bergi presi fu Yudea den sma ben taki fu den sani disi.

⁶⁶ Ala sma di yere ben teki den sani disi na prakseri. Den ben aksi densrefi taki: “San a pikin disi o tron?” Bika a ben de krin fu si taki a krakti fu Gado ben de na en tapu.

Den sani san Sakarias taki

⁶⁷ Sakarias kon furu nanga a Santa Yeye, dan a bigin taki san Gado gi en fu taki. A taki:

⁶⁸ Mi e opo a nen fu Masra, a Gado fu Israel. Bika A langa wan anu gi En folku èn A ferlusu den.

⁶⁹ A gi unu wan tranga Ferlusuman, di de wan bakapikin fu En knekti David,

^70-71 fu ferlusu unu puru ini a makti fu un feyanti, nanga fu den sma di no lobi unu srefsrefi. Langaten na fesi A ben meki den santa profeiti fu En taki a sani disi kba.

⁷² Na so A sori sari-ati na den afo fu unu. A hori ensrefi na a santa ferbontu fu En.

⁷³ Bika A ben meki wan sweri nanga un afo Abraham,

⁷⁴ taki A ben o ferlusu unu puru ini a makti fu un feyanti, fu un kan dini En sondro frede.

⁷⁵ Un o man dini En un heri libi langa, tapu wan santa fasi, èn tapu wan fasi di bun ini Gado ai.

⁷⁶ Èn yu, mi pikin, den sa kari yu wan profeiti fu a Moro Hei Gado, bika yu sa waka na Masra fesi, fu meki pasi klari gi En,

⁷⁷ fu meki a folku fu en sabi taki Gado o ferlusu den, te A gi den pardon fu den sondu.

⁷⁸ Bika fu di Gado abi bigi sari-ati gi unu, a Wan di o kmopo na heimel o kon na unu fu yepi unu. A o kon leki a son di e opo

⁷⁹ fu tyari leti kon gi den sma di de na dungru, gi den di de na pasi fu go dede. Èn A o sori unu a pasi fu freide.

⁸⁰ A boi ben e gro, èn moro nanga moro a Yeye ben gi en krakti. A ben e tan na ini a dreisabana te leki a dei di a sori ensrefi na den sma fu Israel.