Lobisingi 1 - Sranan Tongo Bible 2016

¹ A moro moi lobisingi fu Salomo.

A trowmisi e angri fu a trowmasra

² Bosi mi! Mi wani firi fa en mofo e bosi mi. Bika a lobi fu yu e drungu mi moro win.

³ A switi smeri fu yu skin, yu nen di de so switi na tapu den tongo, na dat' meki den yongu uma lobi yu.

⁴ Hari mi kon. Meki un gwe es'esi. Mi kownu, tyari mi go ini en kamra. Meki wi prisiri, meki wi breiti fu yu ede Wi e prijse a lobi fu yu a bun moro win. Fu tru, dat' meki den uma mus fu lobi yu!

⁵ Uma fu Yerusalem, mi buba dungru, ma mi moi. A blaka leki den tenti fu Kedar, moi leki den garden fu Salomo.

⁶ No luku taki mi buba blaka, taki son bron mi. Bika den brada fu mi den ati ben e bron na mi tapu. Mi ben mus hori wakti na den droifidyari, ma mi eigi dyari mi no ben man luku.

⁷ Taigi mi, yu di mi lobi nanga mi heri ati taigi mi, pe yu tyari den kaw fu yu go wei pe yu e meki den rostu te bakadina. No meki mi e waka nanga wan duku tapu mi fesi psa den mati fu yu nanga den kaw fu den.

⁸ Tye, yu, moro moi uma di de. Efu yu no sabi pe mi de, luku den futumarki fu den skapu. Tyari yu skapu go wei pe den tenti fu den skapuman de.

⁹ Mi lobi, yu moi leki wan fu den uma asi di e hari a wagi fu Farao.

¹⁰ Luku fa yu fesi moi nanga den yesilinga, den krara na yu neki.

¹¹ Gowtu sani wi sa gi yu nanga solfru krara na en.

¹² Solanga mi kownu didon tapu en bedi mi e panya mi switismeri.

¹³ Mi lobi, wan pikin saka nanga switismeri yu de na mindri mi borsu.

¹⁴ Mi lobi, wan bosu hennabromki yu de ini den droifidyari fu Engedi.

¹⁵ Mi lobi, luku fa yu moi, yu moi fu tru, yu ai gersi di fu wan doifi.

¹⁶ Mi lobi, luku fa yu moi, Iya, trutru moi, ini a moi grun grasi na pe wi o didon.

¹⁷ Den sedrebon na den postu fu un oso, den sipresbon a ososkin.