Leri 1 - Sranan Tongo Bible 2016

A prakseri fu a buku disi

¹ Disi na den leri fu kownu Salomo fu Israel, a manpikin fu David.

² Den leri disi na fu gi wi koni, na fu sori wi fa wi mus libi èn fu yepi wi fu wi kan ferstan sani krin.

³ Den e leri wi fa wi mus libi fu kon koni, fa wi kan du Gado wani, fu libi bun èn fu libi krin.

⁴ A e meki den sma di no sabi furu, kon srapu, a e gi yongusma sabi èn leri den fa fu teki den yoisti besroiti.

⁵ Meki den koniwan arki fu den kon moro koni. Meki a yepi den sma di e ferstan sani krin, fu den ferstan sani moro krin.

⁶ Dan den o man ferstan a leri disi nanga den dipi sani, den sani di koniman e leri nanga den raitori fu den.

⁷ Lespeki gi MASRA na a fundamenti fu sabi, ma don sma e hari den noso gi koni, nanga te trawan e sori den fa den mus libi.

Wantu rai gi yonkuman

⁸ Mi boi, arki te yu p'pa e leri yu fa yu mus libi, no poti den sani na wan sei di yu m'ma e leri yu.

⁹ A o de leki wan kroon tapu yu ede, leki wan keti na yu neki.

¹⁰ Mi boi, te sondusma e suku fu kori yu, yu mus kaka yu futu gi den.

¹¹ No arki den te den e taki: “Kon nanga wi. Meki wi go meki brudu lon. Meki un go luru wan sma di no du noti èn kiri en fu soso.

¹² Meki un swari en libilibi leki fa dedekondre e du, meki un swari en heriheri leki fa sma e go ini den grebi.

¹³ Dan un o feni ala den gudu fu en, un o furu un oso nanga den sani di un o teki fu en.

¹⁴ Kon, teki prati nanga unu. Un o prati ala sani makandra.”

¹⁵ Mi boi, no teki waka nanga den, no du den sani di den e du.

¹⁶ Bika den gaw fu go du ogri, es'esi den e meki brudu lon.

¹⁷ Te fowru si taki sma span net gi den, den no e frei go fasi na ini.

¹⁸ Ma den sma disi e fromu na ini den eigi net, èn den e lasi den libi na ini. Den ben go fu go kiri trawan, ma na densrefi e dede.

¹⁹ Na disi e psa nanga ala sma di e du ogri fu kon na den moni, den e pai fu en nanga den libi.

Koni e gi warskow

²⁰ Koni e bari bun tranga tapu strati, a e opo en sten na wowoyo,

²¹ a de fu yere tapu den uku fu den moro dyugudyugu strati, na a bigi doro fu a foto, pe sma e kon makandra, a e taki:

²² “Unu di no sabi furu, olanga un o tan bribi ala sani? Un di e spotu, olanga yu o tan meki spotu? Un don sma, olanga a o de so taki un no lobi sabi srefsrefi?

²³ Efu un sa gi yesi na den warskow fu mi, dan mi sa gi un ala a koni di mi abi, èn mi o meki un ferstan den sani di mi e taki.

²⁴ Ma un no ben wani arki di mi ben e kari, no wan sma ben wani luku di mi ben e langa mi anu.

²⁵ Un poti ala den rai fu mi na wan sei, èn un drai un baka gi den warskow fu mi.

²⁶ Na fu dat'ede mi o lafu now te a ongoloku o miti unu, mi o teki un meki spotu te a ogri o miti unu.

²⁷ Te a ogri o kon na un tapu leki wan tranga winti, a ongoloku leki wan draiwinti, te nowtu nanga problema o kon na un tapu,

²⁸ dan un o bari kari mi, ma mi no o piki, un o suku mi, ma un no o feni mi.

²⁹ Bika den no lobi sabi srefsrefi, èn den no teki a besroiti fu lespeki MASRA.

³⁰ Un no ben teki den rai tu di mi gi unu, èn ala den warskow fu mi un poti na wan sei.

³¹ Dat' meki un o piki den froktu fu den sani di un du, èn un o sidon nanga ala den sani di un poti fu du.

³² Bika a arki di den sma di no sabi furu no wani arki, nanga a span di don sma no e span nanga a libi, o kiri den.

³³ Ma a sma di e arki mi, o libi ini freide, a no abi fu frede taki wan ogri o miti en.”