Hosea 1 - Sranan Tongo Bible 2016

¹ Disi na san MASRA taigi Hosea, a manpikin fu Beri. A ben de ini a ten di Usia, Yotam, Akas nanga Yekiskia ben de na makti ini Yuda. A pisten dati Yerobeam, a manpikin fu Yoas, ben de kownu fu Israel.

A sondu fu Israel

² Na so MASRA bigin taki nanga Hosea. MASRA taigi Hosea taki: “Go trow nanga wan motyo, dan yu e meki pikin nanga en. Bika a heri kondre e libi wan huru libi fu di den drai den baka gi MASRA.”

³ Dan so Hosea go trow nanga Gomer, a umapikin fu Diblaim. Gomer hori bere, dan a kisi wan manpikin.

⁴ Dan MASRA taigi Hosea taki: “Kari en Yisreel, bika no langa moro dan Mi o strafu a famiri fu Yehu fu a brudu di den meki lon na Yisreel, èn Mi no o meki kownu tiri Israel moro.

⁵ A pisten dati Mi o broko a makti fu Israel ini a Yisreeldal.”

⁶ Gomer hori bere baka dan a kisi wan umapikin. Dan MASRA taigi Hosea taki: “Kari en Lo-Rukama, bika Mi no sa sorgu gi a folku fu Israel moro. Mi no sa gi den pardon moro.

⁷ Ma Mi sa sorgu gi a folku fu Yuda. Mi, MASRA, a Gado fu den, sa ferlusu den. Mi no o ferlusu den nanga bo, deigri noso tra fetisani. Mi no o ferlusu den tu nanga asi noso man di e tyari den asi.”

⁸ Baka di Gomer puru Lo-Rukama na bobi, a hori bere baka dan a kisi wan manpikin.

⁹ Dan MASRA taigi Hosea taki: “Kari en Lo-Ami, bika un no de Mi folku moro, èn Mi no sa yepi un moro.

¹⁰ Ma wan ten e kon pe den sma fu Israel o kon furu leki a santi na sekanti. Yu no o man teri den, yu no o man taki o meni den de. Dan leti na a presi pe den ben yere taki: ‘Un no de Mi folku,’ den o kisi a nen baka fu pikin fu a libilibi Gado.

¹¹ Dan den sma fu Yuda nanga den sma fu Israel sa kon na wan, èn den o teki wán edeman fu tiri den, èn fu tyari den kmoto ini a kondre. Bika a o de wan bigi dei gi Yisreel.

¹² Dan un kan taigi un brada baka taki: Ami. Un kan taigi un sisa tu taki: Rukama.”