Marko 1 - UVORO GHWALOLI KWA WANDU WOSE

Machilo gha Johana Mubatizi

¹ Uku ni kudyowa kwa Ilagho Lyaloli lya Jesu Kristo Mwana wa Mlungu.

² Lyanadyowile selyi tondolo Isaya awandike: “Mlungu wanaghorire, ‘Nimtumagha mtumo wangu akukayaile; akuboesele ngila yako.’

³ Lwaka lwa mundu mumoju ekemagha kireti, ‘Boeseni ngila kwa undu ghwa Bwana; ghororeni ngila kwa undu ghwake.’”

⁴ Johana Mubatizi kaonekana Kireti, kechila kamba wandu warihe na wabatizo, na Mlungu ujewafwila waya kaung'a zawe.

⁵ Wandu wengi kufuma Judea na Jerusalemu wakamghendela, wekeriha kaung'a zawe, naye kawabatiza kele mweta ghwa Jordani.

⁶ Johana orwere nguo ilukilo na singa za ngamila, na mkoa ghwa mrongo chunu. Na chakulya chake cheluo ni nzighe na uki ghwa kireti.

⁷ Naye kachila keghamba, “Ukujagha mundu nyuma yangu aniisile imi. Hata imi sifweni kudamika na kuvifungula vilatu vake.

⁸ Imi namubatiza na meji, ela iye ujemubatiza na Roho wa Kuela.”

Kubatizo na kutimo kwa Jesu

⁹ Nao majua ghalye, Jesu keja kufuma Nazareti, muzi ghwa Galilaya, kabatizo ni Johana kele mweta ghwa Jordani.

¹⁰ Naye Jesu aghenda kufuma mejini, shwa ng'ori kaona mlunguni kwafunguka, na Roho wa Kuela kaselela sa iringo ighulu yake.

¹¹ Na lwaka lukafuma mlunguni lukeghamba, “Uwe ni Mwanwangu mshayo, niboelogho nuwe.”

¹² Nao shwa ng'ori Roho kamghenza kireti.

¹³ Naye kakala aho kireti matuku mirongo mine, ketimo ni Shetani; naye oluo na nyamandu, nawo wana malaika wakamtumikila.

Jesu kuwapang'a wawati makumba wane wamwirime

¹⁴ Nao ikakala Johana aghenda angizo kifungoni, Jesu keja Galilaya kechila Ilagho Lyaloli lya Mlungu,

¹⁵ keghamba, “Ngelo yafika, na uzuri ghwa Mlungu ghuo avui, riheni na kudumusa llagho Lyaloli.”

¹⁶ Nao ilyi Jesu eluo keita mbalimbali ya bahari ya Galilaya, kaona wawati makumba waili: Simoni na Andrea wakwawe, wekewata makumba na nyavu zawe.

¹⁷ Naye Jesu kawauza, “Niirimeni, nemi nijemdea wawati wandu.”

¹⁸ Nawo iyo ngelo yenyi wakasigha nyavu zawe, wakamwirima.

¹⁹ Naye asughuta hambiri kuchache, kamwona Jakobo mwana wa Zebedayo na Johana wakwawe, kele ishua lyawe wekeboesa nyavu zawe.

²⁰ Naye shwa ng'ori kawapang'a wamwirime; nao wakamsigha tatie Zebedayo na wadei kazi, wo wakamwirima.

Mundu eluo na pepo

²¹ Nao Jesu na wairimi wake wakafika Kapernaumu; nao ijua lya Sabato, kangila kele sinagogi kufundisa.

²² Nawo wandu wakashiniso ni mafundiso ghake, kwani oluo kefundisa sa mundu ewo na udimo, na si karakara na walimu wa Sheria.

²³ Na alyenyi kele sinagogi yawe koluo mundu eluo na pepo.

²⁴ Naye kakema, “Uwo na undu muni nesi, Jesu wa Nazareti? Wendeja kutihaitisa-ba? Nakumanya kamba uwe nuwe Mweli afumile kwa Mlungu!”

²⁵ Ela Jesu kaikemela pepo keghamba, “Nyamala, na umfume!”

²⁶ Nao iyo pepo ikamruha, ikakema na lwaka lubwaa, ikamfuma.

²⁷ Na wandu wose weluo alye wakashinika, hata wakauzana, “Nini ichi? Ni mafundiso maishi! Hata kwa udimo wazikemela pepo na zamsikila!”

²⁸ Nao awenyi uvoro ghwake ghukaera isanga lyose lya Galilaya.

Jesu kuboesa wandu wengi

²⁹ Nao Jesu na wairimi wake waghenda kufuma kele sinagogi, wakangila nyumba kwa Simoni na Andrea, weluo ngila mojori na Jakobo na Johana.

³⁰ Na alyenyi mkekulu wa Simoni otungure kwa kukala oluo mkongo wa msuko, nawo wakamghorera.

³¹ Niko Jesu kamghendela, kamwata mkonu na kumnula, na msuko ghukamsigha; naye kawatumikila.

³² Ilya hafukeni yenyi, ijua lyamalika, wandu wakamletela Jesu wakongo wose na awa weluo na pepo.

³³ Wandu wose wa muzi wakamtindirira hambiri ya mjangoni.

³⁴ Naye kawaboesa wakongo wengi weluo na makongo gha kila mbari na kufunya pepo ziwase, hata sadumusile pepo ingi kughora, kwani zemumanyile.

Jesu kuchila Galilaya

³⁵ Nao ilyo ikesho Jesu kauka na ikesho kiro sikotambuke, kaghenda andu kwa chanya kulomba Mlungu.

³⁶ Naye Simoni na wambawe wakamwirima.

³⁷ Na waghenda wamwona wakamuza, “Wandu wose wendekuhada.”

³⁸ Naye kawauza, “Ndokoni tighende mizi mizima, eri nipate kuchila nakose, kwa kukala ilyo nilyo lyiniletile.”

³⁹ Naye kaita Galilaya yose, kechila kele sinagogi zawe na kufunya pepo.

Jesu kumuboesa mundu wa ukoma

⁴⁰ Nao mundu mumoju wa ukoma kamjila Jesu, kadyaya ngokoro na kumvoya keghamba, “Kwadima, uniombochole.”

⁴¹ Jesu kamfwila waya, kaghorora mkonu ghwake, kampeta kemuza, “Nashaya uombochoke.”

⁴² Nao iyo ngelo yenyi ukoma ghukabowa, naye kaombochoka.

⁴³ Nao Jesu kamfunda na kumtuma,

⁴⁴ kemuza, “Ola swamghorere mndungi, ela ghenda kwa mkohani ukuonyeze, na ufunye sadaka ya kuombochoka kwako, selyi Musa alaghize, eri wandu wamanye kamba waboa.”

⁴⁵ Ela iye kafuma na kudyowa kueresa uvoro ghwa kuombocholo kwake, nagho uvoro ghukaera hata Jesu kadeo sangile kele muzi keono. Kwa hung'u kakala shighati ya muzi; nawo wandu wakamghendela kufuma gasi zose.