Filemoni 1 - UVORO GHWALOLI KWA WANDU WOSE

¹ Imi Paulo, mfungo kwa undu ghwa Kristo Jesu, na wakwetu Timotheo. Kwa Filemoni, mdei kazi mumbetu

² na ikanisa lyikoghanilagha nyumba kwako, na wakwetu Afia, na Arkipo askari mumbetu:

³ Mbazi na sere kufuma kwa Mlungu Aba na kwa Bwana Jesu Kristo ikale kwenyu.

Mashayo na idumusi lya Filemoni

⁴ Namfunyila Mlungu wangu asanta kila ngelo nikukumbukagha kele malombi ghangu,

⁵ kwa kukala nanasikilagha gha mashayo ghako na idumusi kwa Bwana Jesu na kwa wandu wose wa Mlungu.

⁶ Nendelomba kamba umojori ghwetu kele idumusi ghujuzile kukudea utambukilo ni baraka zose tipatagha kwa kuwataniso na Kristo.

⁷ Kwani wakwetu, mashayo ghako ghanihawa mabwelo mengi na kunikumba ngolo! Na uwe waziboela ngolo za wandu wa Mlungu.

Ilombi kwa undu ghwa Onesimo.

⁸ Kwa undu ughu nedimagha sikweo na wogha ghungi, kwa undu ghwa Kristo, kukuza udee selyi ikufweni.

⁹ Ela kwa undu ghwa mashayo, nendekulomba. Nadea hung'u hata ngera sani imi ni Paulo, balozi wa Kristo Jesu, na indakwenyi nio mfungo kwa undu ghwake.

¹⁰ Kwa hung'u nendekulomba kwa undu ghwa mwana wangu Onesimo, mwana wangu kele Kristo. Kwani nakala tatie ngelo nio kifungoni.

¹¹ Ni ulya Onesimo eluo sekufweni kindu chingi, ela ndamu wanifwana imi hata na uwe.

¹² Ndamu nendemuja kwako, naye ni sa ngolo yangu imi mwenyi.

¹³ Neshaile nikalanye naye aha aniwarure kibalo chako ngelo nio kifungoni kwa undu ghwa Injili.

¹⁴ Ela sidimagha kudea ilagho lyingi sodumuse. Sishaile kukufunganyizila uniwarure, ela nanashaile uloli ghwako ghukale ghoshaya uwe mwenyi si ghwa ndighi kungi.

¹⁵ Siikosagha Onesimo wanakalile kulele kwa ngelo eri auye kwako sena putu.

¹⁶ Na ndamu si sa msunyi kungi, ela kuchumba msunyi, kwani iye ni wakwetu mshayo kele Kristo. Ni wa faida mbwaa kwangu! Na kwako uwe ukalagha na faida kuchumba, sa msunyi na sa wakwetu kele Bwana.

¹⁷ Kwa hung'u, ngera uniririkanya kukala mumbenyu, muhokere selyi udimagha kunihokera imi mwenyi.

¹⁸ Naye ngera akukoselele ilagho lyingi, ango ewo na deni yako, unilaile imi.

¹⁹ Imi Paulo nawandika imi mwenyi na mkonu ghwangu, nijelipa. (Siifweni nikughorere naose kamba wana deni yangu ya uwe mwenyi).

²⁰ Haya ndamu wakwetu, nideile hung'u kwa undu ghwa Bwana. Nisaruse ngolo kwa undu ghwa Kristo.

²¹ Namanya selyi kwenyi nawandika niko kwenyi unideilagha, hata namanya udeagha kuchumba ya selyi nikulombagha.

²² Ngila mojori na agho, uniikile kirani chumba, kwani nio na kukoserea kwa ngila ya malombi ghenyu, Mlungu usikilagha na aniuje kwenyu.

Maroghoi gha kudua

²³ Epafrasi mfungo mumbetu kwa undu ghwa Kristo Jesu, wamuroghowa,

²⁴ ngila mojori na Marko, Aristarko, Demasi na Luka, wadei kazi wambetu.

²⁵ Mbazi ya Bwana Jesu Kristo ikale nenyo inyose.