لاوئلی‌لر 1 - کتاب مقدس به زبان آذربایجانی جنوبی - نسخه ادبی

یاندیرما قوربانی

¹ رب موسانی چاغیریب حوضور چادیریندان اونا بله ددی:

² «ائسرایئل اؤولادلارینا دانیشیب اونلارا بله دِه: ”سئزدن هر کس اؤز حیوانلاریندان ربّه قوربان گتئرنده، قوربانلیغینیزی گرک قویون-کچئدن، یا دا مال-حیواندان گتئرسئن.

³ اگر یاندیرما قوربانی قویون-کچئدندئر، گرک عیبسئز اِرکَک بئر حیوان اولسون. قوربانی گرک حوضور چادیرینین گئرئشئنده تقدئم اتسئن کی، ربّئن حوضوروندا مقبول اولسون.

⁴ او آدام گرک اَلئنی یاندیرما قوربانینین باشینا قویسون کی، قوربان، اونون حاقّیندا کفّاره کئمی قبول اولونسون.

⁵ او، گامیشی ربّئن حوضوروندا کَسسئن. هارون نسلئندن اولان کاهئنلر، گرک قانی تقدئم ادئب، او قوربانگاهین هر طرفئنه سَپسئنلر کی، حوضور چادیرینین گئرئشی یانیندادیر.

⁶ سونرا او آدام یاندیرما قوربانینین دَرئسئنی سویوب، قوربانی تئکه-تئکه دوغراسین.

⁷ کاهئن هارونون اؤولادلاری قوربانگاهدا اود قالاییب، اوستونه اودون قویسونلار.

⁸ سونرا هارون نسلئندن اولان کاهئنلر، بو تئکه‌لرله گامیش بالاسینین باشینی و پئیئنی قوربانگاهین اودونلاری ائله قالانان اود اوستونه دوزسونلر.

⁹ لاکئن قوربانین ائچ‌آلات و آیاقلارینی او آدام سو ائله یوسون. کاهئن بونلارین هامیسینی قوربانگاهدا توستوله‌دئب، یاندیرما قوربانی یاندیرسین؛ بو ربّه خوش عطئر اوچون، اودلا تقدئم اولونان قورباندیر.

¹⁰ آمّا اگر اونون یاندیرما قوربانی قویون-کچئدندئر، گرک عیبسئز اِرکَک حیوانی گتئرسئن.

¹¹ اونو قوربانگاهین شئمال طرفئنده، ربّئن حوضوروندا کَسسئن؛ هارون نسلئندن اولان کاهئنلر حیوانین قانینی قوربانگاهین هر طرفئنه سَپسئنلر.

¹² سونرا او آدام حیوانی، باشی و پئیی ائله بئرلئکده، تئکه-تئکه دوغراسین؛ کاهئن ده قوربانی قوربانگاهین اودونلاری ائله قالانان اود اوستونه دوزسون.

¹³ آمّا ائچ‌آلاتی و آیاقلارینی او آدام سو ائله یوسون. کاهئن بونلارین هامیسینی تقدئم اتسئن و قوربانگاهدا توستوله‌دئب یاندیرسین. بو، یاندیرما قوربانی‌دیر؛ بو ربّه خوش عطئر اوچون، اودلا تقدئم اولونان قورباندیر.

¹⁴ آمّا اگر اونون ربّه یاندیرما قوربانی، قوشدان عئبارتدئر، او زامان قوربانی قومرولاردان یا دا گؤیرچئنلردن گتئرمه‌لی‌دئر.

¹⁵ کاهئن اونو قوربانگاها گتئرسئن، بوینونو اوزوب، باشینی قوربانگاهدا توستوله‌دئب یاندیرسین؛ اونون قانی گرک قوربانگاهین یان طرفئندن آخیدیلسین.

¹⁶ کاهئن قوشون چئنه‌دانینی فضله‌لری ائله چیخاردیب، قوربانگاهین شرق طرفئنه، کوللویه آتسین.

¹⁷ سونرا قوشو قانادلاریندان پارچالاسین، آمّا ائکی یره بؤلمه‌سئن. بوندان سونرا کاهئن قوشو قوربانگاهدا اودونلا قالانان اود اوستونده توستوله‌دئب یاندیرسین؛ بو ربّه خوش عطئر اوچون، اودلا تقدئم اولونان قورباندیر.