۲تسالونئکلی‌لره 1 - کتاب مقدس به زبان آذربایجانی جنوبی - نسخه ادبی

¹ پولوس، سئلوانوس و تئموتاعوسدان، آتامیز تاری و ربّئمئز عئسا مسئحده اولان تسالونئکلئلرئن کئلئساسینا:

² آتا تاری و رب عئسا مسئحدن سئزه فیض و باریش اولسون.

³ قارداشلار، بئز گرک سئزئن اوچون لایئق اولان بئر شکئلده دائم تارییا شوکور ادک، چونکی ائمانینیز داها چوخ آرتیر و بئربئرئنئزه اولان محبّتئنئز داها دا چوخ بؤیویور.

⁴ بو سببدن بئز اؤزوموز، دوشدویونوز بوتون عذابلار و ذئلّتلرئنئزئن قاباغینداکی تحمّول و ائمانینیزدان اؤتری تارینین کئلئسالاری آراسیندا فخرله دانیشیریق.

⁵ بو، تارینین صالح حؤکمونون علامتی‌دئر. اله کی، سئز تارینین پادشاهلیغینا لایئق ساییلاسینیز کی، اونون اوچون ده عذاب چکئرسئنئز.

⁶ چونکی تارینین یانیندا البتّه عدالت بودور کی، سئزه ذئلّت چکدئرنلره، ذئلّت چکدئرسئن

⁷ و ذئلّت چکن سئزلره، بئزئمله بئرلئکده راحاتلیق یتئرسئن، او زامان کی، رب عئسا بوتون قودرتلی ملکلری ائله اود آلووو ائچئنده گؤیدن ظاهئر اولاجاق

⁸ و تارینی تانیمایان و ربّئمئز عئسانین ائنجئلئندن ائطاعت اتمه‌ینلره جزا وره‌جک.

⁹ اونلار ربّئن حوضوروندان و اونون قودرتئنئن شؤوکتئندن محروم قالیب، ابدی هلاکتله جزالاناجاقلار.

¹⁰ بو او گونده باش وره‌جکدئر، او گون کی، مسئح اوز موقدّسلرئنده عئزّت قازانماق و بوتون ائمانلی‌لاری حیرته گتئرمک اوچون گلئر-چونکی سئزه وردئیئمئز شهادته ائناندینیز.

¹¹ بونا گؤره بئز دائم سئزئن اوچون دوعا ادئرئک کی، تاریمیز، سئزی اولوندوغونوز دعوته لایئق سایسین و قودرتله یاخشیلیق اوچون هر جور ائشتئیاق و ائمانین ائشئنی یرئنه یتئرسئن.

¹² اِله کی، تاریمیز و ربّئمئز عئسا مسئحئن فیضئنه گؤره، ربّئمئز عئسانین آدی سئزده عئزّتلنسئن و سئز ده اوندا عئزّتلنه‌سئنئز.