Thupphuan 1 - Zanniat Bible

John Hnenai Thuphuan

¹ Hemi thu tu Jesuh Khrih ai phuanghnak i. A hleng cing tuhhnak thil heh a cengfate hnenah larruai tuhin Pathian in a hnenah a hmuruaihnak i. Ciami tu Khrih in a vancungmi pakhat hlat in a cengfa John hnenah a lingruaihnak i.

² Cen John in a hmuhnak hmuahhmuah heh rel sio i. Pathian hnenin a hlenghnak thuthang le Jesuh Khrih ai a larruaihnak thutak heh John in he bangin rel i.

³ Hemi laibu a siartu le prophet thurelhnak a zatu le he laibu songai a ummi a hluntute tu mihmuifu i. Zaimantifangin he thute a khimhnak can nong zo i.

Pawlpuite Pasarih Hnuksathnak

⁴ Asia peng songai umhnak pawlpuite pasarih kaimah John in thu ning cah ing: Tun can ai a ummi le a um awng zomi le hmai lam ahkhai a um tuhlai Pathian le a bawi tohkham hmai ai a ummi rauhlate pasarih le,

⁵ rintlak thulingtu, hin hmasaber ai Fapa, thihhnak in thoruai leh mi laivum kumpibawite uktu Jesuh Khrih in ninghiohnak le daphnak ning pe tu hram seh. Kinte kin it ai a thihhnak thisan thawmin kin sualhnak in kin luatruai zo i.

⁶ Suangbawi bangin a kumpibawi ukhnak songah Pathian le Pa naruaihtu tuhin kinmah heh kin bawn zo i. Ciamanin songlawihnak le huham heh Jesuh Khrih hnenah kumzangza in um tuseh. Amen.

⁷ Sik tu ih! Khrih tu mairo thawn kawi tuhai mi zongzong in hmu tuh i; amah a dawt awngtute inkhai hmu tuh i. Laivum minung hmuahhmuah kap tlang tuh i. Ciatih hrimhrim i tuh i. Amen.

⁸ Bawipa Pathian in, “Kai tu Alpha le Omega ing,” ti i; Ani tu tunai a ummi le a um awng zomi le hmai lam ahkhai a um tuhlai Hmualnaiber i.

Khrih Hmuhnak

⁹ Kai tu ning unau John, Jesuh a hluntu ing ai Khrih ukhnak songai a tel mite vumai harsa hlengmi ning tuarhnak khai a tuartu ve ing. Pathian thu le Jesuh ai phuanghnak thutak i rel manin Patmos tikulh ah i dah i.

¹⁰ Bawipa nia ah Rauhla in i zel ai i hnua lamin thirhlung bangin a cawm ngai awthawm za ing.

¹¹ Na hmuhnak heh lai songah ngan tulai Ephesa, Smarna, Pergamum, Thyatira, Sardis, Philadelphia le Laodisia khuate pasarih ai a ummi pawlpuite pasarih hnenah kuat tu,” tiin ti i.

¹² Ciatih ai a titu heh aisu ini tiin i her fangin sui maivarhnak tungkhuamte pasarih hmu ing.

¹³ Cia maivarhnak tungkhuamte pasarih lakah minung bang ngai pakhat ding ai a keruh tian angki fual sil ai sui kangkhap a kang ah khap hmu ing.

¹⁴ A sam tu tuuhmul le vur bangin ngo i. A mit tu mailing bangin vam i.

¹⁵ A ke tu pumsuhnak mai songah ciangruai hnuaah ciang ngai ai nawthnak dar bangin tleu i. A aw tu tipui lian tlaver thawm bangtluk i.

¹⁶ A kiahhan lam kut in arsite pasarih awh ai a ka songin nak hnih san ralvang pakhat suak i. A mithmai tu sun laitak ai ni bangin tleu i.

¹⁷ Ciatihin i hmu fangin mithi bangin a keham ah i tlu i. A kiahhan lam kut in i dai ai, “Lau mah! Kai tu a hmasaber le a hnuataber ing.

¹⁸ A nungmi khai ing. I thi awng napui tunah kumzangza hrangah nung lehsal zo ing Thihhnak le mithi khua vumah thunaitu ing.

¹⁹ Ciamanin na hmuhnak thilte le hmai lamai a um tuhlai thilte heh ngan tu.

²⁰ I kiahhan lam kut ai na hmuhhnak arsite pasarih le sui maivarhnak tungkhuam pasarih ai sullam thuthup tu hetihin i. Arsite pasarih tu pawlpuite pasarih ai vancungte i ai maivarhnak tungkhuamte pasarih tu pawlpuite pasarih i,” tiin ti i.