Ezekiel 1 - Zanniat Bible

Pathian A Hmu Hmasaberhnak Pathian Tohkham

¹ Kum sawmthum kum, hla li hla, ni nga nia ah, kaimah suangbawi Ezekiel, Buzi ai fapa khiah Babylon ram Khebar Runpui hiangah sal tuhin pommi Judah mite thawn um tlang i ing. Van hong ai Pathian a lar hmu ing.

² Cia kum tu kumpibawi Jehoiachin sal ah a pomhnak kum ngahnak kum i.

³ Ciami Babylon ram Khebar Runpui hiangah kaimah hnenah Bawipa ponghnak za ai a huham hatdan khai ling ing.

⁴ Kai inkhai sik hlen ai sak lamin khuahu hleng hmu ing. Khuanim sah ngai songin vantlingtleleuh zurhzo ai a hiang cingkim tleu zutzo i. Vantlingtleleuh fangin dar bangin a tleu hmu ing.

⁵ Khuahu laitak ah ramsa nung bang minung hmel bangmi pali hmu ing;

⁶ ikhalselai hmaite pali le kote pali nai tlang ṭen i.

⁷ Amahte kete tu tlang zer ai a tinte tu kawlpawcang tiin bang i; tleu ngai ai nawthnak dar bang i.

⁸ Hmaite pali le kote pali nai tlang ṭen ai hlaiah ko pakhat hniaah minung kut pakhat nai tlang ṭen i; ciatihin pakhat in kut pali ṭen nai i.

⁹ Ciami Ramsa pakhat in amahte ko pahnih ṭen pharh tlang ai ning li nai, a sau le a kau camra dun in um tlang ai a kohmur tu khing dun sio i. A thawn tlang fangin amahte taksa her dun lo niu in a burpui in thawn tlang i.

¹⁰ Ramsa nung pakhat in hmai phun dangdang pali ṭen nai i. Hmai lamah minung hmai nai i; kiahhan lamah chintit hmai nai i; kekeh lamah tu kawlpaw hmai nai ai hnua lamah muvanlai hmai nai i.

¹¹ Ramsa nung pakhat in amahte ko pahnih ṭen pharh ai ciatihin ramsa dang ko hmur khiah khing ṭen i. Amahte kote pahnih tu pharh loin a taksa vumah khup tlang i.

¹² Ramsa nung pakhat in ning li ṭen ah hoi ai ciatihin amahte taksa her kul loin a nuamhmuncang ah a burpui in feh thil i.

¹³ Ciami a nung ramsate lakah tu mailingpui bangin a tleu zurhzo um ai ciami tu catloin thawn thliahthlo i. Ciami mailingpui songin vantlingtleleuh bangin a tleu zutzo suak i.

¹⁴ Ciami a nung ramsate tu vantlingtleleuh tluk cak in hnua le hmaiah kik tlang zutzo i.

¹⁵ Ciami a nung ramsate pali i sik hlen laitak ah ramsa nung pakhat hiangah lengke pakhat ṭen, lengkete pali laipua tong in hmu ing.

¹⁶ Ciami lengkete pali tu a bangvek ciang i; lungmankhung bangin tleu i; ciami lengkete songah lengke dang pakhat cang ngai in a tan lamin a luthnak um ṭen i;

¹⁷ ciatihin lengke tu a hiamhnak ah her thai i.

¹⁸ Lengkete ai a rong kamhnak tu sang roh ai mak roh i; mit lekin dim i.

¹⁹ A nung ramsate a thawn fangin lengkete khai thawn ve i; laipua in a vum lamah a kai fangin khai lengkete khai kai ve i.

²⁰ A nung ramsate tu amahte nuamhmuncang ah feh i; ciabang cekci in lengkete khai feh ve i; zaimantifangin a nung ramsate in uk i.

²¹ Ciamanin a nung ramsate a feh fangin ituseh, a com fangin ituseh, ihlahle hlivua lakah a kai fangin ituseh, lengkete inkhai bawn ve sio i.

²² Ciami a nung ramsate lu vum ahcen ngaihsunurkul in a var ngai a vum khuh um i.

²³ Ciami hniaah a nung ramsate ding i. A kote pahnih khiah a rualpui ramsa nung lamah pharh ai a dang a kote pahnih tu amahte taksa khuk tlang ṭen i

²⁴ Amahte ko zaphnak thawm kaimah in za ai tipui huk thawm bang i. Ralkapte siar cawk lo ai thawmvang bang i; Hmualnaiber Pathian aw bang i. A zuang lo fangin amahte ko khup tlang i.

²⁵ Ikhalselai amahte lu vumai umhnak a vum khuh in thawmvang tu thang thotho i.

²⁶ Ciami a vum khuh vum salawn ah lungmankhung tleu ai bawnhnak kumpibawi tohkham bang um i. Ciami tohkham vumah a totu heh minung thuamzal bang i.

²⁷ Ciami thuamzal tu mai songai tleuhnak dar ling bang i. A hiang cingkim hmuahhmuah var ngai in tleu i.

²⁸ Bak bangin pianzia phuncang nai i. Hemi tleuhnak tu Bawipa umhnak larruaitu i.