Tito 3 - O LE TUSI PA'IA - Ekalesia Katoliko Roma

O Amioga Fa‘a-Kerisiano

¹ ‘Ia e fa‘amanatu atu ‘iā i latou ‘ia latou usiusita‘i i ali‘i sili ma faipule, ‘ia gaua‘i, ‘ia nofo sauniuni fo‘i i latou i galuega lelei uma lava.

² ‘Aua ne‘i ‘upu leaga i se tasi, ‘aua ne‘i fa‘amisa, a ‘ia fa‘apalepale, ma ‘ia fa‘aali atu le agamalū uma i tagata uma lava.

³ Auā o i tatou fo‘i, sa vālea i tatou anamua, ma fa‘alogogatā, ma fa‘asesēina, sa ‘au‘auna i tu‘inanau ma mea ‘ese‘ese e fiafia ai, sa nonofo ma le loto leaga ma le matau‘a, sa ‘inosia ma feitaga‘i.

⁴ A ‘ua fa‘aalia mai le agalelei ma le alofa i tagata o lo tatou Fa‘aola le Atua,

⁵ ‘ona fa‘aola mai ai lea o ia ‘iā i tatou, e lē ‘ona o galuega o i le amiotonu sa tatou faia, ‘ae tusa ma lona lava alofa i le fa‘atā‘eleina i le toefuata‘iina ma le fa‘afouina e le Agaga Pa‘ia.

⁶ ‘Ua na fa‘amaligi tele mai i luga ‘iā i tatou, ‘ona o Iesu Keriso lo tatou Fa‘aola;

⁷ ‘ina ‘ia ta‘uamiotonuina i tatou i lona lava alofa tunoa, ‘ia fai i tatou ma suli e tusa ma le fa‘amoemoe i le ola e fa‘avavau.

⁸ O le ‘upu moni lenā. ‘Ou te loto fo‘i ‘ina ‘ia e matuā fa‘amalosi atu i ia mea, ‘ina ‘ia naunau i latou o ē ‘ua fa‘atuatua i le Atua ‘ona ‘ia faia galuega lelei; e lelei lava ia mea ma aogā i tagata.

⁹ A ‘ia taumamao ma sā‘iliga valea ma tala tupuga, ma le femisa‘iga, ma le fefinaua‘iga i la le tulafono; auā o ‘upu lē aogā ia ma le fa‘atauva‘a.

¹⁰ O le tagata na te fa‘atupu le fēvaevaea‘iga ‘ia e ‘alo ‘ese ‘iā te ia pe a uma atu ‘iā te ia le a‘oa‘iga e atu tasi pe atu lua.

¹¹ Auā ‘ua iloa o le tagata fa‘apenā ‘ua liliu‘eseina lava o ia, ma ‘ua agasala, ‘ua fa‘asalaina o ia e ia.

O Fa‘atonuga Mulimuli

¹² A ‘ou ‘auina atu ‘iā te oe o Aretima, po o Tuiko, ‘ia e fa‘ata‘alise ‘ona sau ‘iā te a‘u i Nikopoli; auā ‘ua tonu lo‘u manatu ‘ou te nofo ai i le tau ma‘alili.

¹³ ‘Ia e matuā fesoasoani i le malaga a Sena le lōia, ‘atoa ma Apolo, ‘ina ‘ia lē mativa i lā‘ua i se mea e tasi.

¹⁴ ‘Ia a‘oa‘oina fo‘i o tatou uso ‘ia faia e i latou galuega lelei e maua ai mea aogā, ‘ina ne‘i lē fua mai i latou.

¹⁵ O i latou uma lava o ‘iā te a‘u, o lo‘o alolofa atu i latou ‘iā te oe, ‘ua ‘ou alofa atu ‘iā i latou o ē alolofa mai ‘iā te i matou i le fa‘atuatua. ‘Ia ‘iā te ‘outou uma lava le alofa tunoa. Amene.