Salāmo 9 - O LE TUSI PA'IA - Ekalesia Katoliko Roma

O le Vi‘iga i le ALI‘I ‘ona o lona Fa‘asala i ē na ita i ona Tagata Ma le usu pese i mutu-lapeni. O le salāmo a Tavita

¹ ‘Ou te vivi‘i atu ‘iā te oe le ALI‘I ma lo‘u loto ‘atoa; ‘ou te ta‘uta‘u atu fo‘i ou vāvega uma.

² ‘Ou te fiafia ma ‘ou ‘oli‘oli ‘iā te oe; ‘ou te pese lava i lou suafa, lē Silisili‘ese.

³ Na liutuaina o ē ‘ua ita mai ‘iā te a‘u; ‘ona tausuai ai lea o i latou, ma fano lava ai ou luma.

⁴ Auā ‘ua e faia lo‘u fa‘amasinoga ma la‘u finauga; ‘ua e ti‘eti‘e i le nofoāli‘i e fa‘amasino tonu ai.

⁵ ‘Ua e a‘oa‘i atu i nu‘u ‘ese; ‘ua fa‘aumatia e oe o ē amio leaga, ‘ua e sōloi‘esea o latou igoa e o‘o i le fa‘avavau fa‘avavau lava.

⁶ O ē ita mai, ‘ua fa‘aumatia e fa‘avavau o latou fa‘atafunaga; ‘ua e olopalaina ‘a‘ai; ‘ua galo lava le fa‘amanatuina o i latou.

⁷ A o le ALI‘I, e ti‘eti‘e lava ia e fa‘avavau; ‘ua saunia e ia lona nofoāli‘i e fa‘amasino ai.

⁸ O ia lava na te fa‘amasinoina le atu laulau ma le tonu; na te fa‘atonuina ma le sa‘o finauga a nu‘u.

⁹ O le ALI‘I e fai ma ‘olo maualuga mo lē ‘ua fa‘asauāina, o le ‘olo maualuga i ona po e i ai le puapuagā.

¹⁰ E fa‘atuatua ‘iā te oe o ē ‘ua iloa lou suafa; auā, le ALI‘I e, ‘e te lē tu‘una i latou o ē sā‘ili ‘iā te oe.

¹¹ ‘Inā pepese atu ia ‘outou i le ALI‘I, o lo‘o afio i Siona; ‘inā fa‘aali atu ia i nu‘u ana mea na fai.

¹² Auā o lē taui i le toto na te manatua i latou; na te lē fa‘agalogaloina le tagi o ē ‘ua puapuagātia.

¹³ Le ALI‘I e, ‘ia e alofa mai ‘iā te a‘u, ‘ia e silasila mai i lo‘u puapuagā na tupu mai i ē ‘ua ‘ino‘ino mai ‘iā te a‘u, o oe na o lē ‘ua ‘aveina a‘e a‘u a‘i faitoto‘a o le oti;

¹⁴ ‘ina ‘ia ‘ou ta‘uta‘u atu ou vi‘iga uma, i faitoto‘a o le tama fafine a Siona; ‘ou te fiafia i lau fa‘aolataga.

¹⁵ ‘Ua gōgoto nu‘u ‘ese i le lua na latou faia; o lea lava ‘upega na natia e i latou ‘ua lavea ai o latou vae.

¹⁶ E iloa le ALI‘I i le fa‘amasinoga ‘ua na faia; ‘ua maileia le fai amio leaga i le galuega a ona lava lima. Selā.

¹⁷ E tulia i seoli o ē fai amio leaga, o nu‘u uma lava o ē fa‘agalogalo i le Atua.

¹⁸ Auā e le fa‘agalogaloina e fa‘avavau o ē matitiva o le fa‘amoemoega fo‘i o ē ‘ua puapuagātia e lē fano lea a lē tu a lē tu lava.

¹⁹ Le ALI‘I e, ‘inā tula‘i mai ia, ‘aua ne‘i manumālō tagata; ‘ia fa‘amasinoina nu‘u ‘ese i ou luma.

²⁰ Le ALI‘I e, ‘ia e fa‘amatata‘u ‘iā te i latou; ‘ia iloa e nu‘u ‘ese o tagata lava i latou. Selā.