Roma 14 - O LE TUSI PA'IA - Ekalesia Katoliko Roma

‘Aua le Fefa‘asala‘i i mea ‘ua Tāofi ‘Ese‘ese Ai

¹ ‘Ia ‘outou talia lē ‘ua vaivai i le fa‘atuatua, ‘ae lē ‘ina ‘ia fa‘amasinoina o māsalosaloga.

² O le tāofi o le tasi, e ‘aina mea uma lava; ‘ae ‘aina e lē ‘ua vaivai na o mea e tutupu i le lau‘ele‘ele.

³ ‘Aua ne‘i ta‘ufa‘atauva‘aina lē ‘ai i lē le ‘ai ma lē ‘ua lē ‘ai, ‘aua ne‘i fa‘asala o ia i lē ‘ua ‘ai; auā ‘ua talia o ia e le Atua.

⁴ O ai ‘ea oe lē fa‘amasino atu i le ‘au‘auna a le tasi? E tumau ia pe pa‘ū i lona lava ali‘i; ‘ae fa‘atumauina lava ia, auā e mafaia e le Atua ‘ona fa‘atumau ‘iā te ia.

⁵ O le manatu o le tasi, e sili le tasi aso i le tasi aso; a o le manatu o le isi, ‘ua tutusa aso uma lava. ‘Ia ta‘ito‘atasi ma mautinoa lona lava manatu.

⁶ O lē ‘ana‘ana i le aso, e ‘ana‘ana o ia i ai ‘ona o le Ali‘i; o lē e ‘ai, e ‘ai o ia ‘ona o le Ali‘i, auā ‘ua fa‘afetai i le Atua; o lē lē ‘ai fo‘i, e lē ‘ai o ia ‘ona o le Ali‘i, ‘ua ia fa‘afetai fo‘i i le Atua.

⁷ Auā e leai so tatou e ola mo ia lava, e lē oti fo‘i se tasi mo ia lava;

⁸ auā ‘āfai tatou te ola, tatou te ola mo le Ali‘i, pe ‘āfai ē oti, e oti mo le Ali‘i; o lenei, pe ola pe oti i tatou, o tagata lava o le Ali‘i i tatou.

⁹ Auā o le mea lava lea na maliu ai Keriso, ‘ina ‘ua toetū mai ai, ma ‘ua soifua ai, ‘ina ‘ia faia o ia ma Ali‘i i ē ‘ua oti ‘atoa ma ē o ola.

¹⁰ O oe na, se a le mea ‘e te fa‘asala ai i lou uso? O oe na fo‘i, pe se a le mea ‘e te ta‘ufa‘atauva‘aina ai lou uso? Auā tatou te laulaututū uma lava i luma o le nofoa fa‘amasino o Keriso.

¹¹ Auā ‘ua tusia, “‘Ua fetalai mai le Ali‘i, ‘ou te ola a‘u, e to‘otuli mai ‘iā te a‘u o tulivae uma lava, e ta‘uta‘u mai fo‘i o laulaufaiva uma lava i le Atua.”

¹² O lenei, e ta‘itasi i tatou na tala i lana amio i le Atua.

‘Aua le Tausuai ‘ina ‘ia pa‘ū le Tasi i le Agasala

¹³ O lenei, ‘aua ne‘i tatou toe fefa‘amasinoa‘i; ‘ae lelei ‘ina ‘ia manatu i lenei lava mea, ‘aua ne‘i tu‘u ane e se tasi se mea e tausuai ai, po o se mea e tautevateva ai lona uso.

¹⁴ ‘Ua ‘ou iloa ma ‘ou mautinoa i le Ali‘i o Iesu, e leai se mea e leaga fua; peita‘i o sē ‘ua manatu ‘ua leaga le mea ‘ona leaga ai lea ‘iā te ia.

¹⁵ ‘Ae ‘āfai o fa‘atigāina lou uso i au mea e ‘ai, ‘ua e lē toe amio alofa; ‘aua le fano i au mea e ‘ai o ia na maliu ai Keriso.

¹⁶ O lenei, ‘aua ne‘i ta‘uleagaina lo ‘outou lelei.

¹⁷ Auā o le mālō o le Atua, e lē o mea e ‘ai ma mea e inu; a o le amiotonu ma le filemū ma le ‘oli‘oli i le Agaga Pa‘ia.

¹⁸ Auā o lē ‘ua ‘au‘auna atu ‘iā Keriso i ia mea, ‘ua fiafia i ai le Atua, ‘ua ta‘uleleia fo‘i o ia e tagata.

¹⁹ O lenei, ‘ia tatou tausisi i mea e tupu ai le filemū, ma mea e fēfa‘amafanafana a‘i.

²⁰ ‘Aua le lepetia le galuega a le Atua ‘ona o mea e ‘ai; e mamā mea uma ‘ae leaga i le tagata o lē ‘ai ma le tausuai.

²¹ E lelei pe a lē ‘ai ni ‘a‘ano o manu ma ia lē inu uaina, po o se tasi mea e tausuai ai lou uso.

²² ‘Ua mau ‘ea lou tāofi? ‘Ia ‘iā te oe lava ia i luma o le Atua. ‘Amu‘ia lē ‘ua lē fa‘amasinoina o ia e ia i le mea ‘ua manatu o ia e tatau.

²³ A o lē māsalosalo, ‘ua fa‘asalaina ia pe ‘āfai e ‘ai, auā e lē o lana tāofi lea; o mea uma lava e lē ala mai i le tāofi, o le agasala lea.