Roma 10 - O LE TUSI PA'IA - Ekalesia Katoliko Roma

O le Vala‘auina o Nu‘u ‘Ese

¹ Le ‘au uso e, o le mana‘o lava lenei o lo‘u loto, ma la‘u tatalo i le Atua mo Isaraelu, ‘ia fa‘aolaina i latou.

² Auā ‘ou te molimau ‘iā te i latou, ‘ua latou mā‘elegā i la le Atua, ‘ae lē tusa ma le malamalama.

³ Auā ‘ua lē iloa e i latou le amiotonu mai le Atua, ma ‘ua sā‘ili e fa‘atū la latou lava amiotonu, ‘ua latou lē usiusita‘i ai i le amiotonu mai le Atua.

⁴ Auā o le i‘uga o le tulafono o Keriso lea, e o‘o mai ai le amiotonu i ē fa‘atuatua uma lava.

O le Fa‘aolataga mo Tagata Uma

⁵ Auā ‘ua tusia e Mose le amiotonu e maua i le tulafono, “O le tagata na te faia ia mea, e ola ai lava ia.”

⁶ A o le amiotonu e maua i le fa‘atuatua, ‘ua fa‘apea ‘ona fai mai, “‘Aua le fa‘apea ifo i lou loto, ‘O ai se alu a‘e i le lagi?’” (o lona uiga, ‘ina ‘ia ‘a‘ami ‘iā Keriso ‘ia maliu ifo)

⁷ “pe fa‘apea, ‘O ai se alu ifo i le mea loloto’” (o lona uiga, ‘ona ia ‘a‘ami ‘iā Keriso ‘ia maliu a‘e nai ē ‘ua oti;)

⁸ a o lē a ‘ua fai mai ai? “‘Ua latalata ‘iā te oe le ‘upu, o i lou gutu ma lou loto; o le ‘upu lea o le fa‘atuatua o matou o tala‘i atu ai.”

⁹ ‘Āfai ‘e te ta‘utino i lou gutu i le Ali‘i o Iesu, ma talitonu i lou loto ‘ua toe fa‘atūina mai o ia e le Atua nai ē ‘ua oti, e fa‘aolaina ai oe;

¹⁰ auā o le loto e talitonu ai, e o‘o mai ai le amiotonu; a o le gutu e ta‘utino ai, e o‘o mai ai le ola.

¹¹ Auā ‘ua fa‘apea mai le Tusi, “E lē mā se tasi e fa‘atuatua ‘iā te ia.”

¹² Auā e lē ‘ese‘ese le Iutaia ma le Eleni; auā o le Ali‘i e to‘atasi o tagata uma e faula‘i lona alofa ‘iā te i latou uma lava o ē vala‘au atu ‘iā te ia.

¹³ Auā “E fa‘aolaina i latou uma o ē vala‘au i le suafa o le Ali‘i.”

¹⁴ O lenei, pe fa‘apefea ‘ona latou vala‘au atu i lē ‘ua latou lē fa‘atuatua i ai? Pe fa‘apefea fo‘i ‘ona latou fa‘atuatua i lē ‘ua latou lē fa‘alogo atu i ai? Pe fa‘apefea fo‘i ‘ona latou fa‘alogo atu, pe ā leai se tala‘i atu?

¹⁵ Pe fa‘apefea fo‘i ‘ona latou tala‘i atu, pe ‘āfai ‘ua lē ‘a‘auina atu i latou? Pei ‘ona tusia, “E matagofie na‘uā o latou vae o ē ‘aumai le tala lelei i le manuia.”

¹⁶ ‘Ae le‘i usiusita‘i i latou uma lava i le tala lelei; auā ‘ua fa‘apea mai Isaia, “Le Ali‘i e, o ai ‘ea ‘ua talitonu ‘iā matou ‘upu e taulogologo atu?”

¹⁷ O lenei, e tupu le fa‘atuatua i le taulogologo atu, o le taulogologo atu fo‘i o i le afioga a le Keriso lea.

¹⁸ ‘Ae ‘ou te fai atu: ‘Ua latou lē fa‘alogo mai ‘ea? “E moni, ‘ua o‘o lo latou leo i le lalolagi uma lava, o a latou ‘upu fo‘i i tulu‘iga o le atu laulau.”

¹⁹ ‘Ae ‘ou te fai atu: E le‘i iloa ‘ea e Isaraelu? ‘Ua mua‘i fai mai Mose, “‘Ou te fa‘atupu le fuā ‘iā te ‘outou e le nu‘u ‘ua lē se nu‘u, ‘ou te fa‘a‘ono‘ono ‘iā te ‘outou i le nu‘u valea.”

²⁰ A ‘ua fa‘amalosi lava Isaia, ‘ua fa‘apea mai, “‘Ua maua a‘u e i latou na lē sā‘ili mai ‘iā te a‘u, ‘ua fa‘aalia a‘u i ē na lē fesili mai ‘iā te a‘u.”

²¹ A ‘ua fa‘apea mai o ia ‘iā Isaraelu, “‘Ua ‘ou fa‘aloaloa atu o‘u lima i aso uma i le nu‘u fa‘alogo gatā ma le fīnau mai.”